तस्वीर: श्याम गुप्ता

भारतको नाकाबन्दीसँगै मधेशी मोर्चाले इन्धन ओसारपसार गर्न नदिएपछि बाराका किसानहरुको धान खेतमै अलपत्र परेको छ ।

इन्धन अभावमा ढुवानीको समस्या त छँदैछ त्यसमाथि दाइँ गर्नका लागि ट्रयाक्टर वा थ्रेसर चलाउनबाट पनि किसानहरु वञ्चित भएका छन् ।

मेसिन चलाउने इन्धन नपाए पछि धान दाइँ गर्न नपाएका किसानको धान खेतमा सुकेर झर्दैछ ।

खेतमा असुरक्षित रहेको धानमा मुसा र चराले पुर्‍याउने नोक्सानी सँगै शीत र पानीले भिजेपछि चामलको गुणस्तरमा पनि गिरावट आउने थप चिन्ता छ ।

रोपाइँका बेला पर्याप्त वर्षा नहुँदा बारामा कुल धान खेतको ७५ प्रतिशत मात्रै धान रोपिएको थियो । त्यसपछि धान खेतमा सिँचाइका लागि समेत इन्धन अभावले उत्पादन राम्रो हुन सकेन ।

जसोतसो गरेर खेतमा पाकेका भदैया, हर्दिया र साबीत्री धान काट्न किसान जुटे पनि दाइँ गर्नका लागि ट्याक्टरमा तेल नभए पछि गाउँघरका सबै ट्याक्टर यतिबेला थन्केका छन ।

तराई आन्दोलनलाई समर्थन गरेको भारतले अघोषित नाकाबन्दी गरे पनि सबै भन्दा मर्कामा यतिबेला तराईका जनता परेका छन् ।

यसअघि स्थानीय किसानहरुले सीमावर्ती भारतीय बजारबाट डिजेल र पेट्रोल ल्याएर काम चलाउने गरेकोमा मोर्चाका कार्यकर्ताहरुले त्यो पनि खोसेर पोखिदिने र जलाइदिने गरे पछि किसानलाई थप पीडा भएको छ ।

नेपालमा सबैभन्दा धेरै धान उत्पादन हुने जिल्लाहरुमध्ये बारा तेस्रो हो ।

श्याम गुप्ता, बारा

प्रतिकृया दिनुहोस