मधेशी मोर्चाले वीरगन्जमा औषधि बोकेको ट्रकमा पेट्रोल बम प्रहार गरी जलाएको छ ।

पेट्रोल बमबाट सल्केको आगोले ट्रकमा लोड गरिएको करिब रु २० लाख बराबरको औषधि जलेर नष्ट भएको प्रहरीले जनाएको छ ।

३ मंसीरमा मोर्चाको काठमाडौंमा बसेको बैठकले औषधि आयात र ढुवानीमा रोक नलगाउने निर्णय गरेलगत्तै व्यवसायीले गोदाममा थन्किएको औषधि राति लोड गरेका थिए ।

वीरगन्ज उपमहानगरपालिका-१४ श्रीपुरमा ‘अति आवश्यक औषधि’ लेखिएको ब्यानर झुन्डयाइ रोकिराखेको ना२ख ८२९२ नम्बरको ट्रकमाथि राति करिब १ बजे मोर्चाका कार्यकर्ताले बम प्रहार गरेको पर्साका प्रहरी उपरीक्षक राजुबाबु श्रेष्ठले जानकारी दिए ।

उक्त  औषधि  नविनम मेडिकल हल जनकपुरतर्फ  लैजानका लागि लोड गरिएको व्यवसायीले बताएका छन् ।

यसैबीच  वीरगञ्ज–पथलैया सडक खण्डको हुलास बिस्कुट उद्योग अगाडि मोर्चाका कार्यकर्ताहरुले ३ मंसीर राति ना ३ ख ४१२७ नम्बरको मकै बोकेको ट्रकमा पनि आगो लगाएका छन् ।

उक्त ट्रक भैरहवाबाट वीरगञ्ज आउँदै गरेको थियो ।

आगजनीबाट ट्रकमा मकै छोप्न प्रयोग गरिएको पाल जलेर नष्ट भएको प्रहरी चौकी प्रहरी नायब निरीक्षक प्रमानन्द यादवले जानकारी दिए ।

प्रहरी टोलीले समयमै आगो नियन्त्रणमा लिएकोले थप क्षति हुन नपाएको बताईएको छ ।

सुरेश बिडारी, वीरगञ्ज

प्रतिकृया दिनुहोस