मधेशी मोर्चाका कार्यकर्ताले मोरङको कटहरीमा बिरामी बालिका बोकेकोे एम्बुलेन्स तोडफोड गरेका छन् ।

१८ महिनाकी बालिका मानसी भट्टराईलाई लिएर रंगेलीबाट विराटनगरतर्फ आउँदै गरेको को १ च ७३७९ नम्बरको एम्बुलेन्सलाई मोर्चा कार्यकर्ताले कटहरीमा तोडफोड गरेका हुन् ।

रंगेलीमा कार्यरत ट्राफिक प्रहरी शैलेश भट्टराईकी छोरी मानसीलाई निमोनिया भएका कारण उपचारका लागि विराटनगर ल्याउने क्रममा आन्दोलनकारीले तोडफोड गरेको चालक दिलिपकुमार मण्डलले बताए ।

“भित्र बिरामी बच्चा छ भन्दा पनि मानेनन्, ढुँगा हानेर एम्बुलेन्सकोे सीसा फुटाए,” चालक राजवंशीले भने, “उनीहरुले हानेको ढुंगा एम्बुलेन्सभित्र पसेपछि बिरामी बोकेकी महिला रुंदै उत्रिइन् ।”

बालिकालाई डा. प्रकाश राणाको क्लिनिकमा देखाएर डेरामा लगिएको र आमा बच्चालाई कुनैपनि चोट नलागेको भट्टराईले बताए ।
एम्बुलेन्स तोडफोडमा सम्लग्न रहेको आशंकामा प्रहरीले संघीय समाजवादी फोरम मोरङका पूर्व सचिव राधे कामत र कार्यकर्ता अशोक ठाकुरलाई पक्राउ गरेको छ ।

मोरङका डिएसपी प्रमोद खरेलका अनुसार आन्दोलनकारीले कटहरीस्थित नेशनल सिमेन्ट उद्योगमा छिरेर आठ वटा ट्रक, दुई मोटरसाइकल र कार्यालयमा तोडफोड गरेका छन् ।

विराटनगरको रोडशेष चोकमा डिजेल बोकेका मोटरसाइकल रोकेर आगो लगाउने कन्हैयालाल साह र शुशिल यादवलाई पक्राउ गरिएको खरेलले बताए ।

यस्तै शिव मन्दिरमा तीन वटा मोटरसाइकल तोडफोड गर्ने जितनारायण साहलाई पनि प्रहरीले पक्राउ गरेको छ ।

महाबीर चोकमा मोटरसाइकल तोडफोडमा संलग्न रुद्र वर्मा, शंकर सहनी, रविकुमार महतो र रबिन्द्र पासवानलाई पक्राउ गरिएको खरेलले जानकारी दिए ।

तस्वीर: कमल रिमाल

कमल रिमाल, विराटनगर

प्रतिकृया दिनुहोस