समाचारसोमबार, मंसिर ७, २०७२
एमालेका मधेशी नेताहरुले मधेशको समस्या सुल्झाउन दबाव दिने
सरकारको नेतृत्व गरिरहेको दल नेकपा एमालेका मधेशी नेताहरुले पार्टीलाई मधेशको समस्या तत्काल सुल्झाउन दबाव दिने भएको छ ।
सिंहदरवारमा भएको केन्द्रिय सदस्य एवम् सभासदहरुको बैठकले पार्टी अध्यक्ष एवम् प्रधानमन्त्री केपी शर्मा ओलीलाई भेटेर दबाव दिने निर्णय गरेको छ । ८ मंसीरमा मधेश समस्या तत्काल सुल्झाउन प्रधानमन्त्री ओलीलाई दबाव दिने तयारी भइरहेको केन्द्रिय सदस्य धर्मनाथप्रसाद साहले बताए ।
उनका अनुसार प्रमुख दलका नेताहरुले गरेको प्रतिवद्धता अनुसार संविधान संशोधन गरेर मधेशको समस्या सुल्झाउन दबाव दिइनेछ । साहले भने, “संविधान जारी भएको लामो समय भइसक्यो, नेताहरु मौन छन् । त्यसैले आफ्नै नेतृत्वलाई दबाबमुलक सुझाव दिने तयारीमा छौं ।”
संविधान जारी गर्नुपूर्व मधेशी नेता तथा सभासदहरुले तयार पारेको १० बुँदे मागमध्ये धेरै पूरा भएको र बाँकी मागबारे दबाव दिने उनले बताए । बैठकले आन्दोलनरत दलहरुको सहमतिमा सीमाकंनको समस्या सुल्झाउनुपर्ने, समानुपातिक समावेशी सिद्धान्त लागू हुनुपर्ने र जनसंख्याको आधारमा निर्वाचन क्षेत्र निर्धारण गर्नुपर्ने सुझाव पार्टी नेतृत्वलाई दिने निर्णय गरेको छ ।
“मधेशका केही साना दलहरुले गरेको आन्दोलनले समग्र मधेशलाई प्रभाव पारिरहेको छ, अहिले पार्टी बचाउन पनि हामीले दबाव दिनुपर्ने बाध्यता हो”, उनले भने । उनले ३२ जना नेता तथा सभासदले नेतृत्वलाई दबाबमुलक सुझाव दिने तयारी भइरहेको बताए ।