खाना पकाउने एलपीजी ग्यासको कालोबजारी गर्ने दमकका एक ब्यापारीको गोदाम स्थानीय प्रशासनले सिलबन्दी गरेको छ ।

दमक–१०, स्थित सर्वोच्च सप्लायर्स र दमक–१३, स्थित क्षितिज इलेक्ट्रोनिक्स पशल सञ्चालक दम्पती यदु र सावित्रा ढकालले मूल्य भन्दा बढीमा विक्री गरेको अनुगमनमा भेटिएको थियो ।

१० मंसीर विहान अनुगमनमा गएको टोलीलाई उनले ग्याँस सकिएको बताएका थिए । तर, इलाका प्रशासन कार्यालय दमकका प्रमुख बासु कोइरालासहितको टोलीले उनको गोदाम छापा मार्दा ६३ वटा सिलिण्डर ग्याँस फेला परेको थियो ।

घरमा राखिएका अन्य १८ वटा सिलिण्डर भने उनले घरमा हुन लागेको ब्रतबन्धको लागि जोहो गरेको बताए ।

ग्याँस उद्योगबाट ९ मंसीर राति १० बजेतिर साढे सात केजी तौलको ६ सय सिलिण्डर मध्ये पचास प्रतिशत सिलिण्डर रातारात घर तथा पशलबाट गायव बनाएको भन्ने गुनासोपछि इलाका प्रशासन र इलाका प्रहरी कार्यालय दमकको टोलीले अनुगमन गरेको थियो ।

ढकालले दमक–११, स्थित आफ्नो क्षितिज इलेक्ट्रोनिक्स पशलबाट राती नै रित्तो सिलिण्डर बोकेर आएका २४३ ग्राहकलाई आधा भरिएको सिलिण्डर बेचेको भएपनि करीब ३ सय ५० सिलिण्डर बाटो घुमाएर राति पौने ११ बजे घरतर्फ लगेको उपभोक्ताले देखेका थिए ।

उनले उद्योगबाट आएको मध्ये तीन सयको हाराहारीमा सिलिण्डर कहाँ विक्री गरे भन्ने कुनै तथ्याङक छैन । उनलाई कालोबजरी गरेको अभियोगमा कारवाहीको तयारी भइरहेको इलाका प्रशासन कार्यालय दमकका प्रमुख कोइरालाले बताए ।

-गोपाल गडतोैला, झापा

प्रतिकृया दिनुहोस