मधेश आन्दोलनको समर्थनमा बारामा स्कुले बालबालिकाहरुलाई प्रदर्शनमा उतारिएको छ । १५ मंसीर विहान बाराको कलैयामा ५ कक्षादेखि माथिका बालबालिकाले मानवसाङ्लो बनाए ।

तस्वीर: श्याम गुप्ता

संयुक्त लोकतान्त्रिक मधेशी मोर्चा र संघीय समावेशी मधेशी गठबन्धनले बालबालिकालाई सडकमा उतारेको हो ।

यसअघि वीरगञ्जमा मधेशमा जारी आन्दोलनका क्रममा ज्यान गुमाएको सम्मानमा भन्दै बालबालिकालाई एनप्याब्सन वीरगञ्जले प्रदर्शनमा उतारेको थियो भने त्यसअघि काठमाडौंमा भारतीय नाकाबन्दीको विरोधमा प्याब्सनले बालबालिकालाई प्रदर्शनमा उतारेको थियो ।

राष्ट्रिय मानव अधिकार आयोग लगायत विभिन्न संस्थाहरुले बालबालिकालाई आन्दोलन, हडताल तथा विरोध प्रदर्शन जस्ता गतिविधिमा संलग्न नगराउन आग्रह गरिरहँदा पनि राजनीतिक गतिविधिमा बालबालिकालाई प्रयोग गर्ने काम रोकिएको छैन ।

तस्वीर: श्याम गुप्ता

आज कलैयामा भएको प्रदर्शनलाई  आन्दोलनका माग पूरा गराउनका लागि बालबालिकाले स्वतःस्फूर्त रुपमा मानवसाङलो बनाएको भनिएको छ ।

प्रदर्शनमा कलैयाका निजी तथा सामुदायिक विद्यालयमा अध्ययनरत विद्यार्थीहरु चन्द्र स्कुलमा भेलाभई मानव साङलो बनाउँदै सदरमुकाम कलैयाको परिक्रमा गरेका थिए ।

उनीहरुले सरकार विरोधि नारा लगाउनुका साथै आन्दोलनको समर्थनमा लेखिएका प्लेकार्ड बोकेका थिए ।

तस्वीर: श्याम गुप्ता

प्रदर्शनमा कक्षा ५ देखि उच्च माध्यमिक तहमा अध्ययनरत विद्यार्थीहरुको सहभागिता थियो ।
श्याम गुप्ता, बारा

प्रतिकृया दिनुहोस