फाइल तस्वीर

पछिल्लो तीन दिनदेखि मधेशी मोर्चाका कार्यकर्ताले नेपालगञ्ज–रुपैडिहा नाकाको दशगजामा राति पनि धर्ना दिन थालेपछि नाका ठप्प भएको छ ।

मोर्चाले दशगजा पारी भारतीय भूमिमा पुगेर धर्ना दिने र त्यहाँबाट नेपालमा रहेका प्रहरीमाथि ढुंगामुढा गर्न थालेपछि १३ मंसीरदेखि इन्धन तथा मालबाहक कुनै पनि गाडी नेपाल प्रवेश गरेका छैनन् ।

मोर्चाको धर्नालाई छल्दै १२ मंसीर मध्यरातमा २५ ट्यांकर डिजल, एक पेट्रोल र २२ मालबाहक गाडीहरु नेपाल भित्रिएपछि थप कुनै पनि गाडीहरु नेपाल भित्रिएका छैनन् ।

१५ मंसीरमा पनि कुनै पनि इन्धन तथा मालबाहक सवारीसाधनहरुले प्रवेश पाएका छैनन् ।

यसअघि  दशगजामा मोर्चाले गाडेको टेन्ट हटाउने क्रममा १४ मंसीरमा प्रहरी र मोर्चाबीच झडप भएको थियो ।

राति ११ बजेसम्म चलेको झडपका क्रममा प्रदर्शनकारीले भारतीय भूमिबाट करिब ३० वटा पेट्रोल बम प्रहार गरेको जमुनाहा प्रहरीले जनाएको छ ।
झडपका क्रममा प्रहरी र प्रदर्शनकारी दुवैतर्फबाट घाइते भएका थिए ।

मोर्चाले भारतबाट आउने इन्धन तथा मालबाहकका गाडीहरुलाई रोक लगाए पनि मोटरसाइकल, साइकल, रिक्साहरुलाई भने रोक नलगाएको इलाका प्रहरी कार्यालय जमुनाहाका इन्चार्ज विष्णु गिरीले जानकारी दिए ।
केशव राना, बाँके

प्रतिकृया दिनुहोस