तीन महिनादेखि मध्यमधेशमा जारी मधेशी मोर्चाको आन्दोलनमा पछिल्लो समय कार्यकर्ताहरुको उत्साह घट्दै गएको छ ।

१६ मंसीर मध्याह्न १२ बजे वीरगञ्ज रक्सौल सीमा क्षेत्रमा धर्ना दिनेहरु ।

करिब १५ दिन अघिसम्म पनि पर्सा र बाराका ग्रामिण क्षेत्रबाट दिनहुँ ठूलो संख्यामा मानिसहरु वीरगञ्जमा आयोजित विरोध प्रदर्शनमा सहभागी हुने गरेकोमा अचेल ग्रामिण क्षेत्रबाट सहभागिता हुन छोडेको छ । आन्दोलनको केन्द्र बनेको वीरगञ्ज तुलनात्मक रुपमा शान्त नै छ ।

वीरगञ्जका पसलहरु बिहानैदेखि खुल्ने गरेका छन् । छठपछि केही दिन मोर्चाका कार्यकर्ताहरुले जबर्जस्ती बन्द गराएको भए पनि अचेल वीरगञ्जका अधिकांश पसल खुलै हुन्छन् । बजारमा सर्वसाधारणको चहलपहल बढेको छ ।

वीरगञ्ज र रक्सौलको सीमामा धर्ना दिएर आयात–निर्यात समेत ठप्प पारेका धर्नाकारीको संख्या पनि घटदै गएको छ । १६ मंसीर विहान ९ बजे सीमा क्षेत्रको मितेरी पुलमा धर्ना दिनेहरु करिब १२ जना मात्रै देखिए । मध्याह्न १२ बजे धर्नामा बस्नेहरुको अनुहार फेरिए पनि संख्या भने उत्तिकै थियो ।

सीमा क्षेत्रमा धर्ना दिनेहरु कम हुँदै जाँदा १४ मंसीर विहान वीरगञ्जमा रोकिएका भारतीय ट्रकहरु रक्सौल जाने प्रयास गरेका थिए । मोर्चाले सडक नै छेक्ने गरी गाडेको टेन्ट ट्रक चालकहरुले हटाउन खोज्दा विवाद भएको थियो । नाका खुलाउन लागिएको हल्लाले गर्दा त्यहाँ मोर्चाका कार्यकर्ताहरु थपिएका थिए भने ट्रक चालकहरु वीरगञ्जतर्फ फर्किएको प्रहरीले जनाएको छ ।

माइस्थान र घण्टाघर बीचको मुख्य सडकमा खुलेका पसलहरु ।

जाडो बढदै गएको, धान काट्ने र गहुँ छर्ने सिजन भएकोले पनि आन्दोलनमा जनसहभागिता घटदै गएको स्थानीयहरु बताउँछन् । आन्दोलन हिंसात्मक बन्दा पनि सहभागिता कम हुँदै गएको विश्लेषण समेत हुने गरेको छ भने, अर्कोतिर लामो समयसम्मको आन्दोलनले जनतामा पनि निराशा व्याप्त छ ।

मधेशकेन्द्रित दलका नेताहरु नै पनि सडकमा आउन छाडेको कार्यकर्ताहरुले आरोप लगाएका छन् ।

पर्सामा संयुक्त लोकतान्त्रिक मधेशी मोर्चा र संघीय समावेशी मधेशी गठबन्धन गरी दुईवटा मोर्चाबीच कसले सडकमा बढी मान्छे उतार्ने भन्दै चल्ने होडबाजी पनि अचेल देखिंदैन ।

धर्नामा बस्नेहरुको संख्या राति केही बढ्ने भए पनि दिनभर भने ३० जना पनि नपुग्ने स्वयम् धर्नाकारीहरु बताउँछन् ।

१६ मंसीर विहान वीरगञ्ज रक्सौल नाकामा रहेको मितेरी पुल ।

शुरुशुरुमा नाकाबाट मोटरसाइकल र साइकल बाहेकका अन्य सवारी साधान आउजाउ गर्न रोक लगाइएको भए पनि अचेल भने टाँगा, टेम्पो सहजै आउजाउ गरिरहेका देखिन्छन् । ट्रकको सट्टा टाँगामै सामान ओसार पसार हुने गरेको भन्सार अधिकारीले बताए ।

वीरगञ्जबाट अन्य जिल्लामा मालवाहक गाडीहरु पनि पहिले भन्दा धेरै गइरहेका छन् । “दैनिक २०० जति गाडीहरु स्कर्टिङमा जिल्ला बाहिर पठाइरहेका छौं, खासै अवरोध पनि आएको छैन,” पर्साका प्रहरी उपरीक्षक राजुबाबु श्रेष्ठले भने ।

मधेश केन्द्रित दलहरुले आन्दोलन थालेको १६ मंसीरमा १११ दिन पुगेको छ भने सीमा क्षेत्रमा धर्ना दिन थालेको ७१ दिन ।

रक्सौलको पेट्रोल पम्पमा पेट्रोल भरेर फर्कदै गरेका  नेपाली मोटरसाइकलको लाम ।

सीमावर्ती भारतीय बजार रक्सौलका पेट्रोल पम्पहरुमा भारतीय भन्दा नेपालीका मोटरसाईकलको लाम बढी लामो हुने गरेको छ ।

तस्कारीबाट भित्रिएको इन्धन महङगो हुने र मिसावट समेत हुने भएकोले वीरगञ्ज र असापासको क्षेत्रका सर्वसाधरणहरु पेट्रोल डिजेल भर्न रक्सौल पुग्छन् ।

मोटरसाईकलमा भरिएको पेट्रोल वीरगञ्ज लगेर महंगोमा विक्री गर्ने र फेरि रक्सौलमा किन्न आउनेहरु पनि अधिकांश भएको रक्सौलका राजेन्द्र पासवानले बताए ।

उनले भने, “यहाँबाट पेट्रोल लगेर वीरगञ्जमा बेच्नेहरुमा भारतीयहरु पनि सक्रिय छन, पेट्रोल धन्दाबाट नयाँ मोटरसाइकल किन्नेहरु पनि उत्तिकै छन् ।”

प्रतिकृया दिनुहोस