भारतको नाकाबन्दीपछि चर्चामा आएको नेपाललाई चीनको केरुङसम्म जोड्ने सडक सामान्य मर्मतको अभावमा निकै असहज बनेको छ ।

तस्वीर: डम्बरकृष्ण श्रेष्ठ

काठमाडौंबाट रसुवागढी नाका राजधानीबाट दुरीको हिसाबले नजिकै भए पनि सडककोे दुरावस्थाले टाढा बनाएको छ ।

धादिङको गल्छी हुँदै रसुवागढी पुग्ने यो १५३ किमी लामो सडक साँघुरो र क्षतिग्रस्त भएकाले चीनको केरूङबाट सामान बोकेर आउने मालवाहक कन्टेनरहरु गुड्दा ठाउँ–ठाउँमा सडक जाम हुने गरेको छ ।

रसुवाको राम्चे, मुल खर्क, फुल खर्क, ठाडेको कज्बे, खोपाङ भीर र सानुभारको खोलामा सड्कको अवस्था निकै खराब छ । भुकम्पपछि गएको पहिरोबाट क्षति पुगेको सडकको मर्मत–सम्भार नियमित नगरिंदा पनि समस्या थपिएको हो ।

सडकमा डिभिजन सडक कार्यालयका केही डोजर देखिए पनि मर्मतको काम भने निकै सुस्त छ ।

चीनबाट सामान आयात गर्ने ब्यापारीहरुको संगठन नेपाल ब्यापार संघका अध्यक्ष कुमार कार्की सरकारले तत्काल साँघुरो र बिग्रेको सडकको मर्मत–सम्भार गरेर दोहोरो गाडी चल्ने बनाइदिए मात्रै पनि समस्या धेरै समाधान हुने बताउँछन् ।

रसुवाका प्रहरी प्रमुख डिएसपी अवधेश बिष्टका अनुसार सडक विभागका डोजरलाई संकटका लागि भनेर राखिएको इन्धन उपलब्ध गराउँदा पनि विभागले रफ्तारमा काम गरेको छैन ।

तस्वीर: डम्बरकृष्ण श्रेष्ठ

“केही ठाउँमा ट्रकका दुवै पांग्रा अटाउने सडक पनि छैन, त्यस्ता ठाउँमा डोजरले सडक सम्याएर ठूलो गाडी दोहोरो गुडने बनाइदिए सजिलो हुन्थ्यो,” विष्टले भने ।

रसुवाका सांसद जनार्दन ढकाल भने सरकारले सडक विभागलाई निर्देशन दिएपनि इन्धन अभावले काममा ढिलाई भएको बताउँछन् ।

“सडक विभागलाई उपलब्ध गराएको २ हजार लिटर डिजल रसुवागढीको भत्केको संरचना हटाउँदा सकिएपछि, आयल निगमलाई थप १२ हजार लिटर उपलब्ध गराइदिन भनेका छौं,” सांसद ढकालले भने ।

११ मंसीरमा उपप्रधान तथा भौतिक योजना तथा निर्माणमन्त्री विजयकुमार गच्छदार र अर्थमन्त्री विष्णु पौडेलले यस क्षेत्रको भ्रमण गरेका थिए ।

तस्वीर: डम्बरकृष्ण श्रेष्ठ

भ्रमणपछि अर्थमन्त्रीले आगमी २ वर्षभित्रै काठमाडौं–रसुवागढी सडक दुई लेनको बनाउने घोषणा गर्दै निर्माणको जिम्मेवारी नेपाली सेनालाई दिने बताएका छन् ।

योजना अनुसार काम भयो भने दुई वर्षमा सडक दुई लेनको बन्ला तर, अहिलेको संकट टार्न तत्काल सडक मर्मत गर्नु जरुरी छ । इमान्दारीपूर्वक काम हुने हो भने ठूला कन्टेनर सहजै आउजाउ गर्ने गरी सडकको स्तरोन्नती सहजै हुने देखिन्छ ।
डम्बरकृष्ण श्रेष्ठ, रसुवागढीबाट

प्रतिकृया दिनुहोस