भारतीय सशस्त्र सीमा वल (एसएसबी) ले हतियारसहित नेपाल प्रवेश गरी मोरङको बुधनगर– ५ भेडियारीका रञ्जित यादवलाई पक्राउ गरी भारत लगेको छ ।

रञ्जितका काका दिलिप यादवका अनुसार १८ मंसीर बिहान साढे ५ बजे शौच गर्न खेतमा गएका रञ्जितलाई दशजगा भन्दा सय मिटर उत्तर (नेपाल तर्फ) आएका हतियारधारी एसएसबीले पक्राउ गरेर लगेका हुन् ।

१९ वर्षीय रञ्जितले तेल तस्करहरुबाट रकम लिने असुली गर्ने र गुण्डागर्दी गरेको एसएसबीले आरोप लगाएको दिलिपले भने ।

रञ्जितका आफन्तले उनलाई एसएसबीले पक्राउ गरेको बारेमा नेपालको प्रशासन गुहारेर केही नहुने भन्दै छुटाउन भारतीय प्रहरीसलाई आग्रह गरेका छन् ।

नेपालीलाई भारतीय सुरक्षाकर्मीले पक्राउ गरेकोे बारे जानकारी नआएको मोरङ प्रहरी प्रवक्ता डीएसपी प्रमोद खरेलले बताए ।
रञ्जितका आफन्तले जोगवनीस्थित एसएसबी क्याम्पमा गएर छुटाउन पहल गरेका थिए, आफन्तका अनुसार अहिले रञ्जितलाई एसएसबीले जोगवनी प्रहरीको जिम्मा लगाएको छ भने उनलाई छुटाउन अदालत जान भारतीय प्रहरीले सुझाव दिएको छ ।

विराटनगर २२ मटेरुवास्थित भारतीय सीमामा बिहीबार नेपाली र भारतीय नागरिक बीच बिवाद भई कुटाकुट भएको थियो । घटनाको बिरोधमा भारतीयले जोगवनी नेताचोकमा शुक्रबार दिनभर प्रर्दशन गरेका थिए ।

घटनाका विषयमा अररिया जिल्लाका डीएम र प्रहरी प्रमुखसमेत जोगवनी आएकाले पनि रंजितलाई कानुनी कारवाहीका लागि हिरासतमा राखिएको बताइएको छ ।

अघिल्लो दिनको बिवादमा नेपाली संलग्न भएको आरोपमा रंजितलाई पक्राउ गरिएको स्थानीयको अनुमान छ ।

अघिल्लो दिनको दुई देश बीचका सीमावर्ति क्षेत्रका नागरिकको बिवादका कारण त्यस क्षेत्रमा भारतीय सुरक्षाकर्मीले आवत जावतमा कडाई गरेको छ ।

कमल रिमाल, विराटनगर

प्रतिकृया दिनुहोस