नेपाली कांग्रेस र मधेशी मोर्चाका आ–आफ्नै अडानका कारण व्यवस्थापिका संसदको बैठक आज, २५ मंसीरमा पनि सूचना टाँस गरी स्थगित भएको छ  ।

नेपाली कांग्रेसले सुशील कोइराला नेतृत्वको सरकारले २० असोजमा दर्ता गराएको संविधान संशोधन विधयेक संसद्‌मा पेश गर्नुपर्ने माग राख्दै आएको छ । यही माग राख्दै कांग्रेसले २४ मंसीरमा पनि बैठक अवरुद्ध गरेको थियो ।

यता मधेशी मोर्चाले भने सीमाङ्कनमा सहमति नहुँदासम्म संविधान संशोधन विधेयक अघि बढाउन नदिने बताउँदै आएको छ ।

यद्यपी यस अघिदेखि संसद अवरुद्ध पार्दै आएको मोर्चाले पुनःनिर्माण प्राधिकरण सम्बन्धी विधेयक भने संसदबाट पारित गर्नका लागि आफूले सहयोग गर्ने बताउँदै आएको छ ।

सरकार र मोर्चाबीच आज भएको वार्तामा पनि सरकारले पुनःनिर्माण प्राधिकरण गठन र संविधान संशोधन सम्वन्धी नेपाली कांग्रेसले दर्ता गराएको दुवै विधेयक संसदमा प्रस्तुत गर्ने बारे छलफल भएको थियो ।

मोर्चाले कांग्रेसले दर्ता गराएको विधेयकले आफ्ना माग पूरा नहुने भन्दै पुनःनिर्माण प्राधिकरण गठनसम्बन्धी विधेयकमात्रै पेश गर्न भनेपछि वार्ता विना निष्कर्ष टुंगिएको थियो ।

पुनःनिर्माण सम्बन्धी विधेयक मात्रै पेश गर्दा कांग्रेसले अवरोध गर्ने, संविधान संशोधन पेश गर्दा मोर्चाले अवरोध गर्ने भएकाले सूचना टाँस गरी संसद वैठक स्थगित गरिएको हो ।

संसदको अर्को बैठक २७ मंसीर दिउँसो तीन बजेका लागि बोलाइएको छ ।

कपिल भट्ट, काठमाडौं

प्रतिकृया दिनुहोस