राष्ट्रपति विद्यादेवी भण्डारीले संविधानलाई सर्वोेत्कृष्ट भन्न हिच्किचाउन नहुने बताएकी छन् ।

तस्वीर: विद्रोही गिरी

राष्ट्रपति भण्डारीले मानव अधिकारको विश्वव्यापी मान्यतालाई आत्मसात गरेको, संघीय लोकतान्त्रिक गणतन्त्रलाई सुनिश्चित गरेको नयाँ संविधान अहिलेसम्मकै अग्रगामी र सर्वोत्कृष्ट भएको बताएकी हुन् ।

२६ मंसीर दिउँसो नवलपरासीको प्रगतिनगरस्थित जनज्योति नमूना माध्यामिक विद्यालयको स्वर्ण महोत्सवको उद्घाटन गर्दै उनले शिक्षा क्षेत्रमा सरकारी लगानी अझै पनि निकै थोरै भएको भन्दै शिक्षामा लगानी बढाउनु पर्नेमा जोड दिइन् ।

उनले भनिन्, “शिक्षामा आवश्यकताभन्दा कम लगानी छ, तर लगानीको तुलनामा नतिजा झन कम छ ।” शिक्षाको कमीले गर्दा महिलाहरु अन्धविश्वास र कुरुतीले पीडित भएको राष्ट्रपति भण्डारीले औंल्याइन् ।

ज्ञान र प्रविधिलाई बालबालिकाको हितमा प्रयोग गरिनुपर्नेमा जोड दिंदै उनले बालबालिकालाई विश्वस्तरको शिक्षा प्रदान गर्नु अहिलेको चुनौति भएको बताइन् ।
राष्ट्रपति भण्डारीले विद्यालय परिसरमा निर्माण भएको स्वर्ण स्तम्भको अनावरण गरेकी थिइन् ।
विद्रोही गिरी, नवलपरासी

प्रतिकृया दिनुहोस