विवाहपञ्चमी महोत्सवमा सरिक जानकी मन्दिर पुगेकी राष्ट्रपति विद्या भण्डारीको विरोध गर्दै मधेशी मोर्चाले नाराबाजी र ढुंगा प्रहार गरेपछि तनावग्रस्त बनेको जनकपुरको अवस्था अहिले सामान्य बनेको छ ।

तस्वीर: ईश्वरचन्द्र झा

सुरक्षाकर्मीले जानकी मन्दिर परिसर छोडेपछि मधेशी मोर्चा र प्रहरीबीचको झडप साम्य भएको छ भने स्थानीय यूवा क्लबले भीडलाई शान्त बनाउँदै आफ्नै अगुवाईमा डोला निकालिरहेको छ ।

युवाहरुको अगुवाईमा राममन्दिरबाट श्रीरामको र जानकी मन्दिरबाट किशोरीजीको डोला रंगभूमी मैदानका लागि प्रस्थान गरेको छ ।

दिउँसो भएको झडपको घटनाले विवाहमहोत्सवमा सहभागी हुन आएका केही श्रद्धालुहरु फर्किए पनि अहिले स्थानीय र भारतबाट आएका तिर्थयात्रीहरु समेत महोत्सवमा सहभागी भएका छन् ।

मधेशी मोर्चाको ढुंगामुढा, मन्डप जलाइयो
आज, १ पुष विहान राष्ट्रपति भण्डारीले जानकी मन्दिरमा करिब १० मिनेट पूजा–अर्चना गरी फर्केकी थिइन् ।

तस्वीर: रासस

काठमाडौंबाट नेपाली सेनाको हेलिकप्टरमा प्रधान सेनापति राजेन्द्र क्षेत्री, भूमिसुधार मन्त्री रामकुमार सुब्बा, सांसद किरण यादवसहित जनकपुर पुगेकी भण्डारीले महोत्सवका सहभागीलाई केही बेर सम्बोधन समेत गरेकी थिइन् ।

राष्ट्रपति भण्डारी विवाहमहोत्सवमा सहभागी हुने कार्यक्रम तय भएदेखि मधेशी मोर्चाले राष्ट्रपतिलाई जनकपुरमा निषेध गर्ने भन्दै २९ पुस साँझ समेत विरोधको कार्यक्रम गरेको थियो ।

राष्ट्रपति मन्दिरबाट बाहिरिंदै गर्दा प्रदर्शन र नाराबाजी गरिरहेका मोर्चाका कार्यकर्ताले उनलाई लक्षित गर्दै ढुंगा प्रहार गरेका थिए । राष्ट्रपति भण्डारी मन्दिरमा प्रवेश गरिरहँदा र निस्केपछि कालो झण्डाको सामना गर्नुपरेको थियो ।

नेपाली सेना, सशस्त्र प्रहरी र नेपाल प्रहरीको सुरक्षा घेरामा राष्ट्रपति भण्डारी गाडीमा चढेर बाहिरिएपछि सुरक्षाकर्मीले जानकी मन्दिर सर्वसधारणका लागि खुला गरेको थियो ।

तर राष्ट्रपति फर्कीसकेपछि पनि स्थिति सामान्य हुन सकेन । मोर्चाका कार्यकर्ताले मन्दिर परिसरमै सुरक्षाकर्मीमाथि ढुंगामुढा शुरु गरे ।

राष्ट्रपति विरुद्ध नाराबाजी गर्दै मन्दिर प्रवेश गरेका आन्दोलनकारी र सर्वसधारणलाई प्रहरीले लाठी चार्ज गर्दै मन्दिर परिसर बाहिर लखेटेपछि पनि लगातार चार घण्टासम्म प्रहरी र प्रदर्शनकारीबीच झड्प भइरह्यो ।

त्यसक्रममा मन्दिर परिसरभित्र आश्रय लिएका करिब १० तिर्थयात्री र ६ जना प्रदर्शनकारी घाईते भएको जनकपुर अञ्चल अस्पतालले जनाएको छ । घाइतेहरुको जनकपुर अस्पतालमा उपचार भईरहेको छ ।

त्यस्तै प्रदर्शनकारीको ढुंगा प्रहारबाट करिब १२ जना सुरक्षाकर्मी घाईते भएको जिल्ला प्रहरी कार्यालय धनुषाले जनाएको छ ।
प्रदर्शनकारीले मन्दिर परिसरभित्र प्रवचनका लागि तयार गरिएको मञ्चको पण्डालमा पेट्रोल बम प्रहार गरी आगो लगाएका छन् ।
रातिको कार्यक्रम लागि तयार गरिएको मड्वाको अवशेष मात्रै बाँकी छ ।

त्रेता युगमा अयोध्याका राम र जनकपुरकी सीताको आजकै दिन विवाह भएको सम्झनामा प्रत्येवर्ष जनकपुरमा विवाहपञ्चमी महोत्सव मनाइन्छ ।

यसअवसरमा अयोध्याबाट साधुसन्तहरु रामको जन्ती लिएर जनकपुर आउने र राम र सीताको विवाह गराउने प्रचलन छ ।
ईश्वरचन्द्र झा, जनकपुर

प्रतिकृया दिनुहोस