समाचारबुधबार, पौष १, २०७२
मोर्चाले हस्तक्षेप गरे प्रतिकार गर्ने युवा संघको चेतावनी
एमालेको ‘मधेश मिसन’ शुरु
प्रमुख सत्तारुढ दल नेकपा एमालेले सर्लाहीबाट दुई महीने ‘मधेश मिसन’ कार्यक्रम शुरु गरेको छ ।
२९ मंसीरमा पूर्वप्रधानमन्त्री एवम् बरिष्ठ नेता माधवकुमार नेपालले युवा संघका अध्यक्ष राजिव पहारीलाई झण्डा हस्तान्तरण गर्दै दुई महीने अभियानको थालनी गरे । नेता नेपालले नयाँ संविधानले दिएको हकअधिकार घरघर पुगेर जनतालाई प्रष्ट पार्न कार्यकर्तालाई निर्देशन दिए ।
यो अभियान अन्तर्गत युवा संघले संविधान बोकेर गाउँटोल र घरघरसम्म पुगेर संविधानबारे जानकारी गराउने, नागरिक अगुवा र राजनीतिक दलका स्थानीय कार्यकर्तासँग अन्तक्रिया गर्ने र मधेश–पहाड–हिमालबीचको सद्भावना बढाउने कार्यक्रमहरु सञ्चालन गर्ने भएको छ ।
सर्लाहीको हरिऔनमा आज सकिएको प्रशिक्षण कार्यक्रमपश्चात युवा संघका नेताहरुलाई विभिन्न जिल्लाको संयोजन गर्ने जिम्मेवारी समेत दिइएको छ ।
तीन महीना लामो आन्दोलन चर्किएको तराई–मधेशमा पहिलो पटक युवा संघले आयोजना गरेको खुला आमसभापश्चात दुई महीनासम्म एमालेका नेता–कार्यकर्ता मधेशमा रहने संघका उपाध्यक्ष रमेशकुमार पौडेलले बताए ।
अभियान उद्घाटन कार्यक्रममा बरिष्ठ नेता नेपालसँगै महासचिव ईश्वर पोखरेल, सचिव प्रदिप ज्ञवाली, योगेश भट्टराई, स्थायी कमिटी सदस्य शंकर पोखरेल, पोलिट्ब्यूरो सदस्य शत्रुघन महतोलगायत सहभागी थिए ।
शान्तिपूर्ण आन्दोलनमा हस्तक्षेप गरे प्रतिकारमा उत्रन्छौंः पहारी
संयुक्त लोकतान्त्रिक मधेशी मोर्चाले प्रमुख दलहरुको कार्यालय जलाउने र शान्तिपूर्ण कार्यक्रममा समेत आक्रमण गरिरहेका बेला ‘मधेश मिसन’को संयोजन गरेको युवा संघका अध्यक्ष राजिब पहारीले दुई महीनासम्म मधेशमा शान्तिपूर्ण कार्यक्रम चलाउने बताए ।
उनले भने, “मधेशका जनताले स्वागत गरिसकेको छ, हामी सीमा–नाकासम्म पुगेर सबैलाई सम्झाउँछौं ।” पहारीले आन्दोलनरत पक्षलाई समेत विभिन्न अन्तरक्रियामार्फत संविधान बुझाउने बताए ।
अध्यक्ष पहारीले भने, “शान्तिपूर्ण भेला, सभा र कार्यक्रम गर्ने सवैलाई अधिकार छ, मधेशका गाउँगाउँमा सभाको आयोजना गर्छाै ।” मोर्चाका कार्यकर्ताले मधेशमा कुनै पनि कार्यक्रम नगर्न धम्की दिइरहेपनि अभियान सशक्त बनाउने पहाडरीले बताए ।
उनले भने, “शान्तिपूर्ण कार्यक्रम कसैले विथोल्ने प्रयत्न मात्रै गर्यो भने पनि सशक्त प्रतिकार गर्छाै, एमालेमाथि बाङ्गो आँखाले हेरे आँखा नै झिकिदिन्छौं ।”
युवा संघले मधेशका विभिन्न जिल्लामा संयोजक तोकेका छन् । संघका अनुसार सिराहामा पौडेल, सप्तरीमा किरण पौडेल, धनुषामा दिलकुमारी पन्त, महोत्तरीमा मञ्जु यादव, सर्लाहीमा माधव बास्तोला, बारामा राजिब पहारी, पर्सामा राजेश साह संयोजक तोकिएका छन् ।