सहमति गर्दै प्रजिअ र अान्दाेलनरत स्वास्थ्यकर्मीहरु ।

विगत २६ दिनदेखि बन्द रहेको सप्तरीको राजविराजस्थित सगरमाथा अञ्चल अस्पतालसहित जिल्लाभरिका सम्पूर्ण स्वास्थ्य संस्था आज, ३ पुसबाट खुलेका छन् ।

२ पुस साँझ अञ्चल अस्पतालमा बसेको सर्वपक्षीय बैठकमा तीनबुँदे सहमति भएपछि आन्दोलनका सम्पूर्ण कार्यक्रम स्थगित गरी चिकित्सक तथा स्वास्थ्यकर्मी काममा फर्किने निर्णय भएको प्रमुख जिल्ला अधिकारी नारायणप्रसाद भट्टले जानकारी दिए ।

बैठकमा प्रजिअ भट्टले अस्पतालभित्रै पसेर प्रहरीद्वारा घटाइएको घटनामा तत्काल दोषी देखिएका जिल्ला प्रहरी कार्यालयका प्रहरी नायब उपरीक्षक नारायणप्रसाद चिमरियाको सरुवा भइसकेको र अन्य मागहरु चाँडै पूरा गर्ने तीनबुँदे सहमति भएको बताए ।

साथै छलफलमा घाइते भएकालाई क्षतिपूर्ति उपलब्ध गराउन तथा भौतिक क्षतिको पूर्ति गराउन जिल्ला प्रशासन कार्यालयले गृह मन्त्रालयमा लेखेर पठाउने र घटनाको छानबिनका लागि क्षेत्रीय प्रशासकद्वारा समिति गठन गराउने तथा छानबिनका क्रममा दोषी देखिनेलाई कारबाही गरिने सहमति भएपछि स्वास्थ्यकर्मी आजदेखि आफ्नो काममा फर्किएका छन् ।

गत ६ मंसीरमा अस्पतालभित्रै प्रहरीले चिकित्सक तथा स्वास्थ्यकर्मीलाई कुटपिट गर्दै दुर्व्यवहार गरेको भन्दै कुटपिट गरेको विरोधमा जिल्लाका चिकित्सक तथा स्वास्थ्यकर्मीले अस्पतालका आकस्मिक सेवाबाहेकका सम्पूर्ण सेवा ठप्प पारी आन्दोलनमा उत्रेका थिए ।

-श्रवणकुमार देव, राजविराज

प्रतिकृया दिनुहोस