आफ्ना माग पूरा गराउन सरकार र प्रमुख तीन दललाई अन्तिम धक्का दिने बताएको मधेशकेन्द्रित दलहरुले वीरगन्जमा ३ पुस बिहानैदेखि सडकमा प्रदर्शन थालेका छन् ।

नयाँ संविधान जारी भएको तीन महिना पुगेको दिन आज ३ पुुसमा वीरगञ्जका सडकमा फेरि टायर बालिएको छ । केही सातादेखि वीरगञ्ज शान्त जस्तै थियो ।

वीरगन्जको पावरहाउस, मुर्ली, घण्टाघर, माइस्थान, घडीअर्वा, भिस्वा होटल चोक, चिनीमिल आवासक्षेत्र लगायतका स्थानमा मधेश केन्द्रित दलका कार्यकर्ताहरुले टायर बालेर प्रदर्शन गरेका हुन् ।

त्यस्तै पर्साको ग्रामीणक्षेत्रमा पनि पदर्शन भएको छ । लंगडी, जानकीटोला भिस्वा, हरिहरपुर, मुड्ली, पोखरिया लगायतका स्थानमा पनि टायर बालेर पदर्शन गरिएको छ ।

पछिल्ला दिनहरुमा वीरगञ्ज–पथलैया सडकमा चलिरहेका सिटी बस, टेम्पोलाई मधेशी मोर्चाका कार्यकर्ताले आज बिहानैदेखि रोक लगाएका छन् ।

प्रदर्शनका कारण वीरगन्जको मुख्य सडकका बजार र पसलहरु बन्द भएका छन् ।

यस्तै बाराको परवानीपुर, कलैया, सिसहनीया र भलुही चोकमा पनि मधेश केन्द्रित दलका कार्यकर्ताहरुले बिहानै देखि सडकमा टायर बालेर प्रदर्शन गरेका छन् । कलैया बजार बन्द भएको छ ।

यसैबीच बन्दको अवज्ञा गरेको भन्दै कलैयामा आज बिहान मोर्चाका कार्यकर्ताले दुई वटा टयाक्टर र एउटा मारुती भ्यानमा तोड फोड गरेका छन् ।

मोटरसाईकलमा आगजनी
बाराको सिम्रौनगढमा ३ पुस बिहान मधेशी मोर्चाका कार्यकर्ताले भारतबाट इन्धन ल्याएको भन्दै एउटा मोटरसाइकलमा आगजनी गरेका छन् ।

नम्बर प्लेट नभएको टिभिएस मोटरसाइकलमा मधेशी मोर्चाका कार्यकर्ताहरुले सिम्रौनगढको रानीवास बजारमा आगजनी गरेका हुन् ।

भारतबाट एक सय ६० लिटर डिजेल र ४० लिटर पेट्रोल लिएर आउदै गरेको मोटरसाईकलमा आगजनी गरिएको मोर्चाका कार्यकर्ताहरुले बताएका छन् । आगजनीबाट मोटरसाइकल ध्वस्त भएको छ ।

नयाँ संविधानप्रति असन्तुष्टि जनाउँदै मधेश केन्द्रित दलहरुले ३० साउनदेखि मध्यतराईमा आन्दोलन गर्दै आएका छन् ।
सुरेश बिडारी, वीरगञ्ज

प्रतिकृया दिनुहोस