केन्द्रीय तथ्याङ्क विभागले आगामी माघको पहिलो सातादेखि भूकम्पपीडितको यथार्थ तथ्याङ्क सङ्कलन गरेर सङ्घीय मामिला तथा स्थानीय विकास मन्त्रालयलाई उपलब्ध गराउने भएको छ ।

पहिलो चरणमा दोलखा जिल्लाबाट तथ्याङ्क सङ्कलन गर्ने र त्यसलाई प्रशोधन गरेर सरकारलाई वास्तविक भूकम्पपीडितको विवरण पठाउन शुरु गर्ने तयारी विभागले गरेको हो ।

विभागले पठाएको तथ्याङ्कका आधारमा भूकम्पपीडितले राहत तथा पुनःनिर्माणका लागि आवश्यक सहयोग पाउनेछन् ।

उच्च प्रविधि प्रयोग गरेर सङ्कलन स्थलबाटै पीडितका सम्पूर्ण विवरण विभागमा पठाउने र त्यसलाई प्रशोधन गरी निरन्तररुपमा स्थानीय विकास मन्त्रालयलाई उपलब्ध गराउने तयारी गरिएको विभागका उप–महानिर्देशक डा रुद्र सुवालले जानकारी दिए ।

प्रत्येक दिन सङ्कलन भएको तथ्याङ्क प्रशोधनमा गरेर त्यसलाई जिम्मेवार निकायमा पठाउने प्रक्रिया अपनाइएकाले क्रमिकरुपमा काम अगाडि बढ्ने र त्यसले गति लिने विश्वास विभागले लिएको छ ।

भूकम्पपीडितलाई राहत उपलब्ध गराउने कार्य ढिलो भएकाले एकमुष्ट तथ्याङ्क सरकारलाई उपलब्ध गराउने भन्दा पनि निरन्तररुपमा सङ्कलन तथा प्रशोधन गरेर तथ्याङ्क हस्तान्तरण गर्न लागिएको उनले जानकारी दिए ।

दोलखालाई पहिलो चरणमा राखिएपनि दोस्रो चरणमा पाँचदेखि सात जिल्लाको तथ्याङ्क सङ्कलन गरी सरकारलाई उपलब्ध गराउने योजना बनाइएको उप–महानिर्देशक डा सुवालले बताए ।

अनुसन्धानका क्रममा लिइने तथ्याङ्क निष्पक्ष हुने दावी गर्दै उनले भने, “तथ्याङ्क सङ्कलनका लागि प्राविधिज्ञलाई फिल्डमा पठाउँछौँ । ती प्राविधिज्ञले जनस्तरमा गएर तथ्याङ्क सङ्कलन गर्नेछन् ।”

विभागले पठाएको इन्जिनियरको साथमा एक जना स्थानीय बासिन्दा हुने र उनीहरु प्रत्येक घरमा गएर तथ्याङ्क सङ्कलन गर्ने भएकाले त्यसमा कसैले पनि प्रश्न उठाउने अवस्था नरहने विभागको दावी छ ।
हरि लामिछाने, रासस

प्रतिकृया दिनुहोस