कांग्रेस वरिष्ठ नेता शेरबहादुर देउवाले जनकपुरमा राष्ट्रपतिमाथि गरिएको ब्यवहार लज्जाजनक भएको बताएका छन् ।

४ पुसमा राजधानीमा स्कुल अफ डेमोक्रेसीद्वारा आयोजित कार्यक्रममा बोल्दै देउवाले भने, “सबैले मान्ने राष्ट्रपति जस्तो व्यक्तिमाथि जनकपुरको जानकी मन्दिरमा गरिएको व्यवहार अत्यन्तै गलत र लज्जाजनक हो, त्यस्तो कार्यमा संलग्नलाई कडा कारवाही हुनुपर्छ ।”

उनले सामाजिक सद्भाव र धार्मिक कुरामा खलल पुने कुरा स्वीकार गर्न नसकिने बताए ।

देउवाले मधेश केन्द्रित दलहरुलाई संवादबाटै निकास खोज्न पनि आग्रह गरे ।

अहिले मध्यतराईमा जारी आन्दोलको औचित्य नभएको भन्दै देउवाले सम्वादबाटै समस्याको समाधान खोज्न सकिने बताए ।

मधेशका माग सम्बोधनका लागि नै संशोधन प्रक्रिया अगाडि बढाइएको भन्दै उनले छलफलबाट संशोधन प्रस्तावमा आवश्यक परिमार्जन गरेर निष्कर्षमा पुग्न सकिनेमा जोड दिए ।

देउवाले भने, “कतैपनि समस्या विहिन व्यवस्था र पद्धति हुदैन, हाम्रो संविधान पनि समस्या समाधानका लागि लचकदार छ ।

“प्रजातन्त्रमा नभई नहुने कुरा स्वतन्त्रता हो, स्वतन्त्रता भएकै कारण शान्तिपुर्णरुपमा अधिकार माग्न पाईन्छ,” उनले भने, “तर, आन्दोलनका नाममा मुलुकलाई अहित हुने काम कसैले गर्नुहुँदैन ।”

कपिल भट्ट

प्रतिकृया दिनुहोस