संयुक्त लोकतान्त्रिक मधेशी मोर्चाका सांसदहरुको नाराबाजीबीच चलेको आजको व्यवस्थापिका–संसद् बैठकमा सत्तारुढ दलका सांसदहरुले राष्ट्रपति विद्यादेवी भण्डारीमाथि दुर्व्यवहार गर्नेहरुलाई कार्बाहीको माग गरेका छन् ।

उनीहरुले जनकपुरमा भएको घटनाबारे सरकारले गरिरहेको कार्बाही प्रक्रियाबारे जानकारी मागेका थिए । सांसद् सुशीला नेपालले जनकपुर घटनाले राष्ट्रपतिको मात्रै नभएर सींगो महिलामाथि अपमान भएको बताइन् । उनले प्रश्न गरिन, “सरकार के गरेर बसेको छ ?”

अर्का सांसद कमला विश्वकर्माले राष्ट्रपतिमाथि भएको दुर्व्यवहारको छानबिन गरी कार्बाही प्रक्रिया अघि बढाउन माग गरिन् । सांसद्हरु गीता क्षेत्री, राज्यलक्ष्मी साह, अनुराधा थापामगर, मीना पुनलगायतले जनकपुर घटनाबारे आक्रोस व्यक्त गरे ।

पुरुष सांसदहरुले समेत यसबारे आपत्ति जनाएका छन् । माेर्चाका सांसदहरुले बैठक अवधिभर नाराबाजी गरेका थिए ।

अर्काे बैठक १२ पुसमा बस्ने सभामुख अाेनसरी घर्तीले जानकारी दिइन् । संविधान संशाेधन विधयेकमाथिकाे सैद्धान्तिक छलफल पनि अर्काे बैठकबाट शुरु हुने उनले बताइन् ।

–कपिल भट्ट, काठमाडौं

प्रतिकृया दिनुहोस