मितेरी पुलमा मधेशी मोर्चाले तेर्स्याएको अवरोध । फाइल तस्वीर

वीरगन्ज–रक्सौल सीमाको दशगजा क्षेत्रस्थित मितेरी पुलमा धर्नामा बसेका आन्दोलनकारी र भारतीय नागरिकहरुको समूहबीच ८ पुस राति झडप भएको छ ।

झडपका कारण मितेरी पुल राति साढे ११ बजे सम्म तनावग्रस्त बनेको थियो ।

भारततर्फबाट आएको समूहले मितेरी पुलमा धर्नाकारीले नाका अवरुद्ध पार्न तेस्र्याएको बाँसको ढाट हटाउन खोजेपछि झडप भएको हो ।

नेपाल सदभावना पार्टी पर्साका सचिव कृष्णा पटेलका अनुसार करिब एक सयजनाको संख्यामा आएका तस्करहरुले मितेरी पुलमा राखिएको बाँसको ढाट हटाउन खोजेपछि प्रतिवाद गर्न खोज्दा झडप भएको हो ।

“तस्करहरुले रक्सौलबाट टाँगा, ठेला र रिक्सामा कपडा लगायतका सामान ल्याएका रहेछन्, हामीले रोक्न खोज्दा उनीहरु लाठी भाटा बोकेर कुट्न आए,” पटेलले भने ।

धर्ना बस्नेहरु करिब १५ जना मात्रै रहेका बेला करिब सयजनाको समूहले आक्रमण गर्न खोजेपछि स्थिती निक्कै तनावपूर्ण बनेको उनले बताए ।

मितेरी पुलमा लगाईएको बाँसको ढाट हटाएर भारतीय नागरिकहरुको तस्कहरुले सामान वीरगञ्ज ल्याएको प्रत्यक्षदर्शीहरुले बताएका छन् । उनीहरुले के–कति परिमाणमा समान ल्याए भन्ने बारे भने केहि खुलेको छैन् ।

झडपबाट कसैलाई पनि ठूलो चोट लागेको छैन ।

आन्दोलनकारीलाई तस्करहरुले कुटन खोजेको समाचार स्थानीय एफएम रेडियोबाट प्रशारण भएपछि भने राति नै मोर्चाका कार्यकर्ताहरुको थप समूह मितेरी पुलमा पुगेको थियो ।

बिहान भने मितेरी पुलमा करिब एक सयको हाराहारीमा आन्दोलनकारीहरु धर्नामा बसेका थिए ।

यसअघि तस्कहरुसँग झडप भएपछि मितेरी पुलमा बाँसको ढाट लगाएर मोटरसाईकल समेत आवतजावतमा रोक लगाईएको थियो ।
सुरेश बिडारी, वीरगञ्ज

प्रतिकृया दिनुहोस