थप समाचारशुक्रबार, पौष १०, २०७२

विवेकशील नेपालीद्वारा बारामा न्यानो लुगा वितरण

हिमालखबर

विवेकशील नेपाली, बाराले बाराको मनहर्वा– ९ स्थित मुसहर बस्ती र बेहरी गाउँका दलित, असहाय तथा बिपन्न परिवारलाई न्यानो कपडा वितरण गरेको छ ।

तस्वीर: श्याम गुप्ता

तस्वीर: श्याम गुप्ता

मनहर्वाको कुसमाडीस्थित मुसहर बस्तीका ५७ घरपरिवारका २५७ जनालाई विवेकशील नेपालीका युवाहरुले न्यानो लुगा तथा ओढ्ने ब्ल्याङकेट वितरण गरेको हो ।

बिपन्न समुदायका लागि यसअघि पाँच दिनसम्म सिमरामा नयाँ तथा पुराना लुगा सङ्कलन अभियान सञ्चालन गरिएको थियो ।

परालमाथि बोरा ओछ्याएर र सुकुल ओढेर सुत्न परिरहेका बेला न्यानो कपडा पाउँदा निकै खुशी लागेको मुसहर बस्तीका पीडितहरुले बताएका छन् ।

आयोजक बिवेकशील नेपालीले मुसहर बस्तीबाट शुरु भएको न्यानो लुगा बितरण अभियानलाई निरन्तरता दिने बताएको छ ।

लुगा महङ्गो भयो
शीतलहरसँगै बढ्दै गएको चिसोका कारण बृद्धबृद्धा तथा बालबालिकाहरुको स्वास्थ्यमा समस्या देखिएको तराई सिमरा हास्पिटलका चिकित्सक डा.रविन्द्रकुमार सिंहले बताए ।

तस्वीर: श्याम गुप्ता

तस्वीर: श्याम गुप्ता

बालबालिका र बृद्धबृद्धाहरुमा विशेषगरी निमोनिया र दम खोकीको असर देखा परेको उनको भनाई छ ।

लामो समयदेखिको आन्दोन र नाकाबन्दीका कारण लुगा निकै महङ्गो भएको र किन्न नसकिएको स्थानीय उपभोक्ता सुगन्धी पासवान बताउँछिन् ।

कपडा ब्यवसायीहरुका अनुसार नाकाबन्दी तथा आन्दोलनका कारण कपडाको आपूर्ति ठप्प भएकाले कपडाको मूल्य महंगो भएको हो ।

विगतमा जाडो याममा विपन्न परिवारलाई विभिन्न संघ–संस्थाले राहत स्वरुप कम्बल वितरण गरेको भए पनि यसपाली विवेकशील बाहेक कसैले पनि न्यानो कपडा र अन्य राहत वितरण गरेको छैन ।
श्याम गुप्ता, बारा

प्रतिकृया दिनुहोस

हिमालखबर जनमत

नयाँ सरकारको नेतृत्व कुन पार्टीले गर्नुपर्छ?

परिणाम हेर्नुस्

Loading ... Loading ...