समाचारशनिबार, पौष ११, २०७२
यो सरकार आफ्नै बोझले ढल्छः देउवा
नेपाली कांग्रेसका वरिष्ठ नेता शेरबहादुर देउवाले वर्तमान सरकार ‘आफ्नै बोझले ढल्ने’ दाबी गरेका छन् ।
‘‘यो सरकार आफ्नै बोझले ढल्छ,’’ ११ पुस बिहान महेन्द्रनगरमा पत्रकारहरुसँग कुरा गर्दै पूर्वप्रधानमन्त्री देउवाले भने ।
सरकारको कार्यशैली र ‘जम्बोे’ मन्त्रिमण्डल गठन भएकोबारे प्रतिक्रिया दिंदै देउवाले जति मन्त्री थपिए त्यति धेरै बोझ हुने आफ्नो अनुभव सुनाए । २०५२ सालमा देउवा प्रधामन्त्री हुदा ४६ जनाको मन्त्रिमण्डल गठन भएको थियो ।
सरकारको ढिलासुस्तीका कारण मधेशी मोर्चासँग वार्ता हुन नसकेको, नाकाबन्दी नखुलेको तथा भूकम्पपीडितका लागि काम नभएको उनको आरोप थियो ।
‘‘यो सरकारले केही काम गर्न सकेको छैन,’’ देउवाले भने । उनले मधेशी मोर्चा र नेपाली कांग्रेसबीच वार्ता भइरहेको बताउदै केही दिनभित्रै सहमति हुन दाबी समेत गरे ।
‘‘औपचारिक/अनौपचारिक रुपमा छलफल भइरहेको छ, केही दिनमा सहमति हुन्छ,’’ उनले भने ।
काग्रेसको आसन्न महाधिवेशनमा सभापति पदको उम्मेदवारीका विषयमा सोधिएको प्रश्नमा भने देउवाले अहिले धेरै कुरा नबोल्ने बताए ।
‘‘महाधिवेशनमा म के गर्छु सबैलाई थाहै छ । अहिले धेरै कुरा नगरौं’’ आफू पक्षीय नेताहरु विमलेन्द्र निधि, चन्द्र भण्डारी, एनपी साउद, रमेश लेखक सहित सुदूरपश्चिम आएका नेता देउवाले कैलाली र कञ्चनपुरको कार्यकर्ताहरुसँग महाधिवशेनका विषयमा छलफल गरेका छन् ।
बच्चु विक, महेन्द्रनगर
प्रतिकृया दिनुहोस
ताजा अपडेट
हिमालखबर जनमत
