गुरुङ भाषाको फिल्म कर्मक्याँ (कर्मरेखा) को हालै छायाङ्कन सम्पन्न भएको छ । गुरुङ भाषा र संस्कृतिमा आधारित यो फिल्म दुई महिनापछि प्रदर्शनमा आउने भएको छ ।

तस्वीरहरु: युवराज श्रेष्ठ

लमजुङको विम्दा, नाल्मा, बेसीशहर लगायतको स्थानमा एक महिना लगाएर हालै छायाङ्कन सकिएको चलचित्र युनिटले जनाएको छ ।

फिल्ममा करिब २५–३० बर्ष अघिका युवाले भोग्नुपर्ने संघर्षलाई समेटिएको निर्देशक जस्सु गुरुङले बताएईन् । उनले भनिन्, “गाउँघरमा मोटरबाटो, सञ्चार लगायतका सुविधा नभएको त्यसबेला टाढा रहेका आफन्त एवं युवाले भोगेका समस्या चलचित्रमा समेटिएको छ ।”

चलचित्रमा गुरुङ सँस्कृतिमा आधारित रोँधी, कृष्ण चरित्रका साथै अन्य सँस्कृतिलाई सुन्दररुपमा प्रस्तुत गरिएको र लमजुङको नाल्मा र बिम्दा गाउँमा बोलिने गुरुङ भाषामा फिल्मको संवाद रहेको उनले जानकारी दिइन् ।

चलचित्रले बैदेशिक रोजगारका समस्यालाई पनि समेटेको चलचित्र युनिटले जनाएको छ ।

झण्डै १५ लाख रुपैयाँको लागातमा निर्माण गरिएको चलचित्र कर्मक्याँ अहिले सम्पादनको चरणमा रहेको चलचित्र युनिटले जनाएको छ ।

चार वटा गीत रहेको चलचित्रमा धनबहादुर गुरुङ र मालती गुरुङले स्वर दिएका छन् । यसअघिका गुरुङ भाषाका चलचित्र भन्दा कर्मक्याँ फरक रहेको र दर्शकले नयाँ स्वाद पाउने निर्देशक गुरुङको दबी छ ।

हनेरी क्याप्टेन लोकबहादुर गुरुङ र धर्ममाया गुरुङ निर्माता रहेको चलचित्र कर्मक्याँमा कथा, गीत र संगीत शंकर गुरुङ ‘बतासे’को छ ।

चलचित्रमा कलाकारहरु सुजित गुरुङ, रिया गुरुङ, विष्णु गुरुङ लगायत नाल्माका स्थानीयको अभिनय हेर्न पाइनेछ ।

चलचित्रमा सह–निर्देशन गजेन्द्र गुरुङ, सम्पादन रञ्जित राना, भेषभुषा उपेन्द्र गुरुङ, मेकअप शम्शेर गुरुङ र छायाङ्कन भेष गुरुङ र खेम थापा मगरले गरेका छन् ।

-युवराज श्रेष्ठ, लमजुङ

प्रतिकृया दिनुहोस