वीरगञ्ज–रक्सौल नाकामा धर्ना बसेका मधेश केन्द्रित दलका कार्यकर्ता र भारतबाट सामान ल्याउने स्थानीयबीच १५ पुस राति पनि झडप भएको छ ।

१५ पुस राति वीरगञ्ज पशुपतिनगर अहिरवा टोलका स्थानीयले मोटरसाईकलमा समान ओसार्न थालेपछि दुबै पक्षबीच झडप भएको हो । झडपमा धर्नाकारी ३ जना र सामान ओसार्नेहरु ५ जना घाइते भएको बुझिएको छ ।

झडपमा वीरगञ्ज– १९ पशुपतिनगर अहिरवा टोलका महेन्द्र कुमार राम, जुत राम, राजु राम, दुर्योधन राम, जयलाल राम घाईते भएका हुन् । झडपमा आन्दोलनकारी तर्फ बारा सिसहनीयाका वृज किशोर महतो, पर्सा मिर्जापुर अमर यादव र भेडिहर्वा निवासी शिवपुजन घाईते भएका छन् ।

घाईते मध्ये वृज किशोर महतोको नारायणी उपक्षेत्रिय अस्पताल वीरगञ्जमा उपचार भैरहेको अस्पताल स्थित प्रहरी बिटले जनाएको छ ।

सामान ल्याउनेहरु भन्दा आन्दोलनकारीको संख्या बढी भएकोले प्रतिकार गर्न सफल भएको नेपाल सदभावना पार्टीका पर्सा सचिव कृष्णा पटेलले बताए ।

सामान ओसार्न प्रयोग गरिएको नम्बर नखुलेको एउटा मोटरसाईकलमा समेत तोडफोड गरेको संघीय समावेसी युवा गठबन्धन पर्साका संयोजक ईश्वर यादवले बताए ।

यसअघि १४ पुस र १३ पुस राति धर्नामा बसेकाहरुलाई नेपाल र भारतका व्यापारी एवं उनीहरुका समर्थकहरुले लखेटेका थिए ।
सुरेश बिडारी, वीरगञ्ज

प्रतिकृया दिनुहोस