वीरगञ्जमा यातायात अवरुद्ध पारेर प्रदर्शन गरिरहेका मधेशकेन्द्रित दलका कार्यकर्ता र यातायात व्यवसायीबीच झडप भएको छ ।

१६ पुस बिहान आन्दोलनकारीले सडक ठप्प पारेर प्रदर्शन गरेपछि व्यवसायीहरुले त्यसको विरोध गरेका थिए । विरोधका क्रममा दुवै पक्षबीच हात हालाहात समेत भएको थियो ।

घण्टाघरभन्दा केही अगाडि तरकारी बजारको सामुन्ने दुवै पक्षबीच हुँदै गरेको झडप प्रहरीले हस्तक्षेप गरेपछि साम्य भयो भने त्यसलगत्तै यातायात समेत सुचारु भयो ।

सदभावना पार्टी केन्द्रीय सदस्य शिव पटेलले काठमाडौं जाने टाटासुमोको टिकट बेच्न लागेका व्यवसायीलाई कार्यकर्ताहरुले रोक्न खोजेपछि झडप भएको बताएका छन् । “केही बेर मुक्कामुक्की भयो, पछि सम्झाएर स्थिति सामान्य बनायौं,” उनले भने । त्यसक्रममा पटेलको हातमा चोट समेत लागेको छ ।

केही दिनदेखि ब्यवसायीहरुले वीरगञ्ज-काठमाडौ टाटासुमो जीप सञ्चालन गर्न थालेका छन् । यद्यपी मोर्चाको अवरोधले गर्दा नियमित हुन सकेको छैन । स्थानीय स्तरमा भने सार्वजनिक यातायात सुचारु हुन थालेको छ ।

संघीय समावेशी मधेशी गठबन्धनका नेता–कार्यकर्ताहरु माईस्थानको सडकमै बसेर बिहान ८ बजेदेखि १० बजेसम्म दुई घण्टा सडक अवरुद्ध पार्दै प्रदर्शन गरेका थिए ।

अहिले वीरगञ्जको अवस्था पूर्ववत सामान्य छ ।
सुरेश बिडारी, वीरगञ्ज

प्रतिकृया दिनुहोस