माइती नेपाल वीरगञ्जले एक वर्षमा (सन् २०१५) मा १२८ जना महिला तथा बालबालिकाको उद्धार गरेको छ ।

गत वर्ष १३८ जना महिला तथा बालबालिकालाई सीमा क्षेत्रबाट उद्धार गरेको संस्थाले यस वर्ष १२८ जना बालबालिका तथा महिलाहरूको नेपाल–भारत सीमा क्षेत्रबाट उद्धार गरेको हो ।

माइती नेपालकी पर्सा प्रमुख संगीता पुरीका अनुसार यस वर्ष ठोरी र वीरगञ्ज नाकाबाट उद्धार गरिएका १२८ मध्ये ११६ जनालाई प्रहरी मार्फत अभिभावकको जिम्मा लगाईएको, १० जनालाई माईती नेपालको केन्द्रीय कार्यालय र अन्य शाखाहरुमा पठाईएको र दुई जना वीरगञ्जमै राखिएको छ ।

उनीहरुलाई दलालहरुले ललाई–फकाई भारतमा बेच्न लैजाँदै गरेको अवस्थामा उद्धार गरिएको हो ।

“धेरै जसोलाई राम्रो कमाई हुने प्रलोभन देखाउने गरिएको छ । आर्थिक अवस्था कमजोर भएका महिला प्रलोभनमा सजिलै फस्छन् ।”

यसरी फकाउन पछिल्लो समय टेलिफोन, फेसबुक लगायतका सामाजिक सञ्जालको दुरुपयोग बढेको उनले बताइन् । जारी मधेश आन्दोलनका क्रममा नाकामा राम्रोसँग निगरानी गर्न नपाएको पनि उनको भनाई छ ।

बन्द हड्तालका कारण यातायातका साधन कम चलेकोले चेलिबेटी बेचविखनमा केहि कमी आएको हुनसक्ने अनुमान उनको छ ।

गत वर्ष ८८ जना बालबालिका तथा महिला हराएको निवेदन परेको थियो भने यस वर्ष ३० वटा निवेदन परेको र सोमध्ये १४ जना महिला तथा बालबालिकालाई उद्धार गरी अभिभावको जिम्मा लगाएको प्रमुख पुरीले जानकारी गराईन् ।

हराएका ३० जनामध्ये सबैभन्दा बढी पर्साबाट १३ जना हराएका छन् । हराएका महिला तथा बालबालिका मध्ये १० जनालाई मोतीहारी, आदापुर, दिल्ली, रक्सौल, पटना र वीरगंजबाट उद्धार गरिएको कार्यालयको तथ्याङ्कमा उल्लेख छ ।

त्यसैगरी ठोरी नाकाबाट उद्धार गरिएका ४० जनामध्ये २१ जना चितवन र १० जना पर्साका रहेका छन् । उद्धार गरिएका मध्ये ३९ जनालाई अभिभावकको जिम्मा लगाईएको छ । ठोरी पोस्टमा चारजना बालबालिका तथा महिला हराएको निवेदन परेकोमा खोजबिन भइरहेको उनको भनाई छ ।
सुरेश बिडारी, वीरगञ्ज

प्रतिकृया दिनुहोस