पश्चिमी वायुको प्रभावका कारण बादल लाग्दा आज काठमाडौँ उपत्यकासहित पहाडी भेगको तापक्रममा केही सुधार आएको छ ।

उपत्यकाको आकाशमा बादल लागेपछि तापक्रममा थोरै वृद्धि भई १७ पुसमा केही न्यानो महसुस भएको छ ।

यद्यपि उपत्यकामा चर्को घाम नलागेका कारण बिहानीपख बढी चिसो भएको थियो ।

पश्चिमी वायुको प्रभावले आंशिक बदली हुँदा आज उपत्यकाको न्यूनतम तापक्रम ४.२ डिग्री सेल्सियस पुगेको मौसमविद् शान्ति कँडेलले जानकारी दिइन् ।

पछिल्ला केही दिन निरन्तर तापक्रम घटेर चिसो बढेका बेला आज मौसम बदलीका कारण उपत्यकामा केही न्यानो महसुस भएको छ । पुसको पहिलो साता उपत्यकाको न्यूनतम तापक्रम घटेर शून्य डिग्रीसम्म पुगेको थियो ।

मौसमविद् कँडेलका अनुसार पहाडी भेगमा एक दुई स्थानमा वर्षा हुनसक्ने र उच्च हिमाली क्षेत्रमा हिमपात हुने सम्भावना छ ।

न्यूनतम तापक्रम बढेपनि उपत्यकामा चर्को घाम भने लाग्न सकेको छैन । अझै एक/दुई दिन उपत्यकाको मौसम स्थिर रहने बताइएको छ ।

आज काठमाडौँ उपत्यकाको अधिकतम तापक्रम १६ देखि १९ डिग्रीसम्म पुग्ने महाशाखाको अनुमान छ ।
रासस

प्रतिकृया दिनुहोस