संघीय समाजवादी फोरमका अध्यक्ष उपेन्द्र यादवले सीमांकन सहित प्याकेजमा सहमति भएपछि तराईमा जारी आन्दोलन रोकिने बताएका छन् ।

वीरगन्जमा २१ पुसमा आयोजित कार्यक्रममा बोल्दै मधेशी मोर्चाका नेता यादवले ‘तीन दलले जबर्जजस्ती गरेर संविधान जारी गरेजस्तै अहिले पनि संशोधन गर्न लागेको’ आरोप लगाए ।

उनले नेपालको संविधान मृत्यु शैय्यामा पुगेको दाबी गर्दै संविधानको पुनर्लेखन हुनुपर्छ भन्ने मोर्चाको माग गरहेको बताए ।

“पटकपटक भएको वार्तामा सरकार गम्भीर रुपमा प्रस्तुत भएको छैन, वार्ताको नाममा नाटक मात्रै गरिरहेको छ,” यादवले भने ।

नेपालमा रहेको विविधतालाई संविधान मार्फत स्वीकार्न नसक्नु नै अहिलेको मुख्य समस्या भएको भन्दै यादवले आफ्ना मागहरु अझै पूरा नभए ‘भयानक’ आन्दोलन गर्ने चेतावनी दिए ।

आफूहरु वार्तामार्फत समस्या समाधानमा केन्द्रित रहेको भन्दै यादवले भने, “सरकार विभिन्न वार्ता टोली र कार्यदल गठन गरेर हामीलाई झुक्याउन खोजिरहेको छ । राजनीतिक रुपमा समाधान हुन नसकेको समस्याको निकास कार्यदलले निकाल्न सक्ने कुरै भएन् ।”

प्रतिकृया दिनुहोस