संसद्को सबैभन्दा ठूलो दल नेपाली कांग्रेसको १३ औँ महाधिवेशन आउन ५९ दिन बाँकी रहँदा पार्टी मुख्यालय सानेपामा विभिन्न माग राखी अनशन बस्नेको सङ्ख्या बढेको छ ।

कांग्रेस डोल्पाका सभापति टङ्कप्रसाद उपाध्याय आफूले क्रियाशील भरेर पठाएको सदस्यतालाई हुबहु लागू गर्नुपर्ने अडानका साथ १२ दिनदेखि आमरण अनशनमा  छन् । उनी  डोल्पामा पार्टीको सङ्गठन कमजोर भएको र नयाँ सदस्यता थप गरेकामा पार्टीले सदर नगरेको भन्दै अनशन बसेका हुन् ।

यसैगरी कांग्रेस केन्द्रीय सदस्य बलबहादुर केसीले सोलुखुम्बु पार्टी सभापति आङ्गेलु शेर्पाले एकलौटी ढङ्गले विधि, विधान र नियमावलीलाई मिचेर क्रियाशील सदस्यता वितरण गरेको भन्दै १० दिनदेखि रिले अनशनमा छन्  ।

केसीले पार्टी सभापतिले पार्टीको विधान विपरीत आफ्ना भाइभतिजा, नातागोता र अरु पार्टीका व्यक्तिलाई क्रियाशील बाँडेको आरोप लगाएका छन् ।

रौतहटका केन्द्रीय सदस्य मो अफ्ताव आलम रौतहट पार्टी सभापति कृष्ण यादवले पार्टीको विधानको पालना नगरी क्रियाशील सदस्यता बाँडेको भन्दै नौ दिनदेखि रिले अनशनमा छन् ।  ६  निर्वाचन क्षेत्र रहेको रौतहटमा चार निर्वाचन क्षेत्रका क्षेत्रीय सभातिलाई जानकारी नगराई क्रियाशील सदस्यता बाँडिएको उनले बताए ।

यता सोलुखुम्बु र रौतहटका पार्टी सभापतिले आफूले केन्द्रलाई बुझाएको सदस्यतालाई नै आधिकारिता दिनुपर्ने भन्दै पाँच दिनअघिदेखि रिले अनशनमा छन् ।

रासस

प्रतिकृया दिनुहोस