वीरगञ्ज–रक्सौल सीमा नाकामा धर्ना बसेका मधेशी मोर्चाका कार्यकर्ता र व्यापारीका सामान बोक्ने समूहबीच आज विहान झडप भएको छ ।

भारतबाट नेपालतर्फ सामान लिएर आउँदै गरेका भारतीय नागरिकहरुलाई मोर्चाका कार्यकर्ताले रोकेपछि दुवैपक्षबीच झडप भएको हो । झडपमा परी मोर्चाका दुई जना कार्यकर्ता र एकजना बटुवा घाइते भएका छन् ।

मोर्चाका चुन्नु मिश्रा, असरफ मन्सुर र बटुवा सरफुद्दिन अंसारी घाइते भएका हुन् । घाइते मध्ये मिश्राको नाकमा र अन्यलाई सामान्य चोट लागेको छ । उनीहरुको नरायणी उपक्षेत्रीय अस्पताल उपचार भईरहेको छ ।

तस्करहरुले रक्सौलबाट तेल र कपडा लगायतका सामान नेपालतर्फ ल्याउँदै गर्दा मोर्चाका कार्यकर्ताले रोकेपछि झडप भएको धर्नाकारीहरुले बताएका छन् ।

शुरुमा कुम्लो बोकेर आउँदै गरेका दुई–तीन जनालाई रोकेपछि उनीहरूले आफ्ना थप साथीहरु बोलाएर आक्रमण शुरु गरेको र त्यसपछि दुवैपक्ष बीच झडप भएको मोर्चाका कार्यकर्ता असरफ मन्सुरले बताए ।

मोर्चाले वीरगञ्ज–रक्सौल नाकाको मितेरी पुलमा धर्ना दिन थालेको आज १०४ औं दिन पुगेको छ । यसबीच पटक पटक व्यापारी र भारतीय नागरिकहरुसँग धर्नाकारीको झडप भइसकेको छ । सीमामा अवरोध भएपछि नेपाल र भारत दुवै तर्फका ब्यापारीहरुले निश्चित समूहलाई आफ्ना सामान बोकेरै वा टाँगा, रिक्साबाट आयात निर्यात गर्न ठेक्का दिने गरेका छन् । यस्तै सामान आयात-निर्यातको ठेक्का लिएका समूहसँग धर्नकारीको झडप भएको हो ।

अहिले धर्नास्थलमा मधेशी मोर्चाले थप कार्यकर्ताहरु खटाएको छ । यद्यपी रक्सौलतर्फबाट धर्नकारीमाथि ढुंगा प्रहार भइरहेको छ ।
जियालाल साह, वीरगञ्ज

प्रतिकृया दिनुहोस