एक चिकित्सकले चितवनको शक्तिखोर र सिद्धि गाविसका विपन्न परिवारका २० बालबालिकालाई एसएलसीसम्म लाग्ने सबै खर्च व्यहोरेर पठनपाठनमा सहयोग गर्ने भएकी छन् ।

चितवनको भरतपुरस्थित क्यान्सर अस्पतालमा मेडिकल अन्कोलोजिस्ट चिकित्सक जया श्रेष्ठले विपन्न परिवारका चेपाङ बालबालिका छानेर सहयोग गर्ने भएकी हुन् । अहिले ती बालबालिका कक्षा २ देखि ५ मा अध्ययन गरिरहेका छन् ।

बालबालिकालाई आवश्यक पोसाक, कापी कलम, झोलालगायत लाग्ने सबै खर्च आफैँले उपलब्ध गराउन थालेको, वार्षिक प्रतिविद्यार्थी करिब तीन हजार खर्च लाग्ने अनुमान गरिएको चिकित्सक श्रेष्ठले बताइन् ।

उनीहरुलाई पढ्ने सामाग्री र लुगाफाटोको कमी हुन नदिने प्रतिबद्धतासमेत डा श्रेष्ठले व्यक्त गरिन् ।

सहयोग पाएका चितवनको शक्तिखोरका १० र सिद्धिका १० जना बालबालिकालाई उनले आजै स्वीटरसमेत उपलब्ध गराइन् ।

सहयोग पाउन थालेपछि उनीहरु नियमित स्कुल आउन थालेको शक्तिखोरको चतुर्मुखी उच्चमाविले जनाएको छ ।

बालबालिकाको शिक्षा राम्रो भए उनीहरुको जीवनसमेत राम्रो हुने बताउँदै चिकित्सक श्रेष्ठले सबैभन्दा पहिले शिक्षामा लगानी गर्नुपर्नेमा जोड दिइन् ।

यसअघि उनले आफ्नै पहलमा पहाडी गाउँमा पटकपटक निःशुल्क स्वास्थ्य शिविरसमेत गर्दै आएकी थिइन् ।
रासस

प्रतिकृया दिनुहोस