जनकपुरमा सद्भावना पार्टी र तराई मधेश सदभावना पार्टीका जिल्ला अध्यक्षद्वय सञ्जय सिंहको ज ३ प २९९१ र रुपनारायण मण्डलको ज २ प ५४१९ मोटरसाइकल स्थानीय व्यापारीले जनकचोकमा जलाइदिएका छन् ।

तस्वीर: घनश्याम मिश्र

मोर्चाका धनुषा संयोजक समेत रहेका सञ्जय सिंहले उद्योग वाणिज्य संघका वरिष्ठ उपाध्यक्ष विजय साह, गणेश यूवा कमिटिका पूर्व अध्यक्ष एवम् उद्योग वाणिज्य संघका सचिव सुरेन्द्र भण्डारी र सन्तोष साहले मोटरसाईकलमा आगो लगाएको आरोप लगाएका छन् ।

साह र भण्डारीले भने जनक चौकमा आफूहरु नपुग्दै मोटरसाईकलमा आगजनी भइसकेको भन्दै आगजनीमा आफ्नो संलग्नता नरहेको बताएका छन् ।

सन्तोष साहले भने मोटरसाईकलमा आगजनी भइरहँदा आफू वाणिज्य संघमा रहेको बताएका छन् ।

यसअघि विहानै जनकपुरमा पसल खोलेको विरोधमा संघीय मधेशी गठबन्धनका विद्यार्थी नेता ज्ञानेन्द्र झाको समूहले पसलमा तोडफोड गरेको थियो ।

स्थानीय नेतामाथि आक्रमण भएपछि मोर्चाले औषधि पसल बाहेक सम्पूर्ण बजार बन्दको घोषणा गरेको छ ।

ईश्वरचन्द्र झा, जनकपुर

प्रतिकृया दिनुहोस