पेट्रोल बिक्रीका लागि झापामा स्थानीय प्रशासनले अनौपचारिक रुपमा तोकिदिएकोे मेचीनगर–११ को प्यारीभिट्टा मैदानबाट बिक्री गर्न नपाएपछि खुद्रे तस्करहरुले दशगजा र मेची पुलमै डिजेल र पेट्रोलको बजार लगाएका छन् ।

मेची पुलमा इन्धन बेच्नेको भीड लागेपछि आवत जावत गर्न समस्या हुन थालेको छ । सबै तस्वीर: गोपाल गडतौला

गत ६ असोजदेखि भारतले नाकाबन्दी शुरु गरेपछि कााँकडभिट्टामा पारीबाट जर्किन र मोटरसाईकलमा इन्धन भरेर नेपाल ल्याई घर–पसलबाटै विक्री हुने गरेको थियो ।

जथाभावी पेट्रोल–डिजल भण्डारण गरेर वेच्दा सुरक्षा खतरा हुने भन्दै स्थानीय प्रशासनले त्यस्तो डिजेल र पेट्रोल विक्रीका लागि काँकडभिट्टाको प्यारीभिट्टास्थित खाली मैदानलाई अनौपचारिकरुपमा विक्रीस्थल तोकिदिएको थियो ।

तर पुस दोस्रो सातादेखि प्रहरीले प्यारीभिट्टामा इन्धन बिक्रीमा रोक लगाएपछि भारतको पानीटंकीबाट ल्याइएको खुद्रा इन्धन साईकल र मोटरसाइकलले पुलको बीच र दशगजामा पुगेका नेपाली मोटरसाईकललाई बोतलबाट बिक्री गरिरहेका छन् ।

बिहानदेखि साँझसम्म सीमापार पानीटयाँकीका पेट्रोलपम्पबाट मोटरसाईकल, साईकल, जर्किनमा इन्धन भरी मेची पुलसम्म ल्याउन अहिले कम्तिमा पनि तीनसय महिला–पुरुष सक्रिय छन् ।

उनीहरुले डिजेल प्रतिलिटर रु १२० र पेट्रोल प्रति लिटर रु १४० मा बिक्री गरिरहेका छन् । तर त्यही पेट्रोल डिजेल अली वारी बजारसम्म आइपुग्दा भने महंगो भइसकेको हुन्छ ।

काँकडभिट्टा नाका केही सहज हुँदै गएका कारण इन्धनको प्यारीभिट्टास्थित खुल्ला खुद्रा बजार बन्द गरिएको इलाका प्रहरी कार्यालय काँकडभिट्टाका नायब उपरीक्षक श्याम अधिकारीले बताए ।
गोपाल गडतौला, झापा

प्रतिकृया दिनुहोस