झापा, बिर्तामोडको बी एण्ड सी अस्पतालमा एकजनाको कुहिनो मुन्तिरबाट चुँडिएको हात शल्यक्रिया गरी जोडिएको छ ।

२६ पुष विहान १० बजे झापा बुधबारे–१ का हर्कबहादुर सुब्बाको काठ मिलमा काम गर्दागर्दै आराले बायाँ हातको कुहिनो मुनी छिनायो । घट्नालगत्तै  विर्तामोडस्थित बी एण्ड सी अस्पताल पुर्‍याइएका उनको हात त्यहाँस्थित चिकित्सकहरुको टोलीले जोडेको हो ।

अर्थोपेडिक सर्जन डा. निराजन पराजुलीको नेतृत्वमा डा. ओमप्रकाश चौधरी, डा. आशिष शाह लगायतले ६ घण्टा लामोे शल्यक्रिया पछि हात जोड्न सफल भएका हुन्  ।

जोडिएको हातमा रक्तसञ्चार राम्रोसँग हुन थालेपछि २९ पुसमा अस्पतालले पत्रकार सम्मेलन गरी आफ्नो सफलताबारे जानकारी गरायो  । डा पराजुलीले  हात, खुट्टा जस्ता अंग चुँडिएको १२ घण्टाभित्रमा ‘प्रिजर्भ’ गरी अस्पतालमा ल्याउन सके जोड्न सक्ने सक्षम चिकित्सकको टोली अस्पतालमा रहेको बताए ।

जोडिएको हातमा पूर्ण रुपमा रक्त–सञ्चार भइरहेकाले शल्यक्रिया सफल भएको र सुब्बाको गाँसिएको हातले ६० प्रतिशतसम्म काम गर्ने चिकित्सकले बताएका छन् ।

“मेरो हात जोडिन्छ जस्तो लागेको थिएन, एउटा हात गुमाइयो भन्ने सोचेको फेरि पाउँदा औधी खुशी छु, ” सुब्बाले भने ।
गोपाल गडतौला, झापा

प्रतिकृया दिनुहोस