नेपाली कांग्रेसले संघीय संविधान अनुसार पार्टी संरचना रुपान्तरण गर्न विधान संशोधनबारे छलफल शुरु गरेको छ ।

आनन्दप्रसाद ढुंगाना संयोजकत्वकाे विधान संशोधन मस्यौदा समितिले आजबाट छलफल शुरु गरेको हो । मस्यौदा समितिका सदस्य पुष्पा भूसालका अनुसार पहिलो बैठकमा सैद्धान्तिक छलफल मात्रै भएको छ ।

मस्यौदा समितिका सदस्यहरुले मुलुक संघीयतामा गएकाले सोही अनुसार पार्टी संरचना बनाउनुपर्ने धारणा राखेका थिए । कांग्रेसले २० फागुनबाट हुने १३ औं महाधिवेशनमार्फत पदाधिकारी बढाउने तयारी गरेपनि पहिलो बैठकमा त्यसबारे छलफल नभएको भूसालले बताइन् ।

उनले भनिन्, “पदाधिकारी बढाउने कि नबढाउने भन्नेबारे शीर्ष नेताहरुसँग छलफल गरेर निर्णय लिइनेछ ।” सभापतिका आकांक्षी सुशील कोइराला र शेरबहादुर देउवा आफू अनुकुल विधान स‌ंशाेधनकाे रणनीतिमा छन् ।

स्रोतका अनुसार सभापति कोइराला उपसभापति बढाउनुपर्ने र देउवा सहमहामन्त्री बढाउनुपर्ने पक्षमा छन् । देउवा भने सकेसम्म पदाधिकारी नबढाउने र बढाउनै पर्ने अवस्थामा सहमहामन्त्री बढाउने तयारीमा रहेका छन् ।

सभापति कोइरालाका लागि भने आकांक्षीहरु समेट्न कुनै हालतमा पदाधिकारी बढाउनैपर्ने बाध्यतामा छन् ।

प्रतिकृया दिनुहोस