डकैतीको अभियोगमा प्रहरीले खोजी गरिरहेका मोरङ उर्लाबारीका एकजना माओवादी कार्यकर्ता गाँजासहित भारतको पानीट्यांकीमा पक्राउ परेका छन् ।

पूर्वी मोरङको उर्लाबारी–२ का राजेश्वर लिम्बु (सुसन) ९०० ग्राम गाँजा सहित १ पुस राति काकडभिट्टासँग सीमा जोडिएको पानीट्यांकी बाट पक्राउ परेको पश्चिम बंगालको नेपाली दैनिक हिमालय दर्पणले त्यहाँको प्रहरीलाई उद्धृत गर्दै उल्लेख गरेको छ ।

वाइसिएल मोरङ क्षेत्र नम्बर– ९ का उपाध्यक्ष समेत रहेका ३० वर्षीय राजेश्वर इलाका प्रहरी कार्यालय उर्लाबारीले डाँका मुद्दामा खोजी गरिरहेका अभियुक्त समेत हुन् ।

करिब तीन साताअघि उर्लाबारी प्रहरीले लिम्बुको समूहमा संलग्न पूर्व प्रहरी हर्क परियारलाई पक्राउ गरी डाँका मुद्दा चलाएको थियो । परियार हाल पुर्पक्षको लागि थुनामा छन् ।

लिम्बु र परियार सहितको समूहले गएको ७ पुसमा उर्लाबारी– ३ की बिना गुरुङको घरबाट १ लाख ७८ हजार रुपैयाँ बराबरको धनमाल लुटेको थियो ।

उनीहरुले ठेक्कापट्टाको कारोबार गर्नेहरुलाई धम्क्याँउदै पैसा असुल्ने गरेको समेत प्रहरीले जनाएको छ ।

पश्चिम बंगालको दार्जिलिङमा लिम्बुले कयौंपटक गोप्य बैठक गरेर ‘समूह’ निर्माण गरिरहेको सूचनाका आधारमा खोजी भइरहेका लिम्बुलाई पक्राउपछि चारदिनको म्याद थपि अनुसन्धान भइरहेको भारतीय प्रहरीले जनाएको छ ।

भारतीय प्रहरीले लिम्बु अन्तराष्ट्रिय आपराधिक गिरोहसँग मिलेर लागुपदार्थको ओसारपसारमा संलग्न रहेको दाबी पनि गरेको छ ।
गोपाल गडतौला, झापा

प्रतिकृया दिनुहोस