संयुक्त लोकतान्त्रिक मधेशी मोर्चाले कार्यदल स्तरमा वार्ताको औचित्य सकिएको जनाएको छ ।

तमलोपाको कार्यालय विजुलीबजारमा पत्रकार सम्मेलन गर्दै मोर्चाले सरकारी कार्यदल निरीह भएकाले यो तहमा वार्ता नहुने जनाएको छ । तमलोपाका सहअध्यक्ष हृदयेश त्रिपाठीले भने, “निर्णय लिन नसक्ने कार्यदलबीच वार्ताको औचित्य समाप्त भएको छ ।”

मोर्चाले प्रमुख तीन दलसँगको वार्ता भने जारी रहने जनाएको छ । “अव शीर्ष नेताहरुबीच वार्ता हुन्छ, कार्यदलमा हुँदैन”, त्रिपाठीले भने ।

मोर्चाले कार्यदलमा ११ बुँदे बाहेक नयाँ माग नराखेको जनाएको छ । “अनुसूचीमा राख्नुपर्छ भन्ने माग छैन, घाइतेको औषधोपचार, क्षतिपूर्ति र न्यायिक छानविन आयोगको माग राखिएको हो”, त्रिपाठीले भने ।

४ माघसम्म सकारात्मक रहेको सम्वाद तीन दलका शीर्ष नेताहरुले उल्ट्याएकाले सहमति जुट्न नसकेको उनले बताए ।

मोर्चाले सहमति वार्ता सहमतिमा नपुगेसम्म आन्दोलन नरोक्ने जनाएको छ । नाकामा धर्ना दिनेहरु फर्किसकेको सन्दर्भमा त्रिपाठीले भने, “फेरि धर्ना बस्छौं, नाका धेरै टाढा छैन ।”

प्रतिकृया दिनुहोस