पाकिस्तानको चारसद्दास्थित बाचा खान विश्वविद्यालयमा आतंकवादी आक्रमण हुँदा कम्तीमा पनि २१ जनाको मृत्यु भएको छ ।

मोबाइलबाट खिचिएको यो तस्वीरमा सुरक्षाकर्मीहरु बच्चाखान विश्वविद्यालय बाहिर पोजिसन लिंदैछन् । तस्वीरः एफपी

खैवरपख्तुनख्वा प्रान्तको चारसद्दा शहरस्थित विश्वविद्यालयमा विद्यार्थी र प्राध्यापकहरुमाथि अपरिचित बन्दुकधारीहरुले एक्कासी गोली चलाउँदा कम्तीमा २१ जनाको मृत्यु भएको पाकिस्तानी पत्रिका द डनको अनलाईन संस्करणले जनाएको छ ।

विश्वविद्यालयमा भएको आक्रमण लगत्तै पाकिस्तानी सेनाले गरेको कार्वाहीमा ४ जना आतंकवादी पनि मारिएको बताइएको छ । पत्रिकाका अनुसार २० देखि २५ वर्ष उमेर समूहका करिब ८ जनाको समूहमा रहेका आतंकवादीहरु उक्त विश्वविद्यालयको पर्खाल नाघेर भित्र पसेका थिए । उनीहरुले एक्कासी गोली प्रहार गर्नुका साथै बम विष्फोट गराएको समाचारमा उल्लेख छ ।

आक्रमणको जिम्मेवारी पाकिस्तनमा प्रतिवन्धित स‌ंगठन तहरिक ए तालिवानले आफ्नो फेसबुक पेजमा पोष्ट गर्दै लिएको छ । तहरिक ए तालिवानले  डिसेम्बर २०१४ मा  चारसद्दा भन्दा ५० किलोमिटर टाढा पेशावरस्थित आर्मी पब्लिक स्कुलमा आतंकवादी आक्रमण गर्दा १४० जनाको मृत्यु भएको थियो ।

फाइल तस्वीर: बाचा खान विश्वविद्यालय

प्रतिकृया दिनुहोस