गोरखा फुजेलका कृष्णप्रसाद अधिकारीको हत्याका अभियुक्त छविलाल पौडेललाई पुर्पक्षका लगि थुनामा राख्न सर्वोच्च अदालतले दिएको आदेश एक महिना बित्दा पनि कार्यान्वयन भएको छैन ।

फरार अभियुक्त छविलाल पौडेल

जिल्ला अदालत चितवन र पुनरावेदन अदालत हेटौडाले उनलाई धरौटीमा छाड्न दिएको आदेशविरुद्ध १ भदौ २०७२ मा सर्वोच्चमा पुनरावेदन परेको थियो ।

६ पुसमा न्यायाधीशहरू गिरीशचन्द्र लाल र दीपकराज जोशीको इजलासले पुनरावेदन र जिल्ला अदालतका आदेशहरू त्रुटिपूर्ण रहेको भन्दै पौडेललाई थुनामा राख्न आदेश दिएको थियो ।

चितवन जिल्ला अदालतमा विचाराधीन रहेको कृष्णप्रसाद अधिकारीको हत्यासम्बन्धी मुद्दाका मुख्य योजनाकार रुपमा गोरखामा तत्कालीन जनसरकार प्रमुख रहेका पौडेलमाथि अभियोग लगाइएको छ ।

जिल्ला अदालतको सुनुवाईका क्रममा उपस्थित भएका उनी सर्वोच्चको आदेश पछि भने फरार छन् ।

प्रहरीले रेड कर्नर नोटिस जारी गरेका फरार अभियुक्त रुद्र आचार्य

जिल्ला अदालतले धरौटी र साधारण तारेखमा छाडेका अन्य अभियुक्तले भने ४ माघमा जिल्ला अदालतमा उपस्थित भई तारेख थामेका थिए ।

तारेखसमेत गुजारेर फरार रहेका पौडेलको खोजी तीव्र पारेको चितवन प्रहरीले जनाएको छ ।

चितवनका प्रहरी उपरीक्षक वसन्त कुँवर अदालतको आदेश प्राप्त भइसकेको र फरार पौडेललाई समात्न सबै संयन्त्र प्रयोग गरेको बताउँछन् । “गोरखा र अन्य जिल्लाहरुमा समन्वय, इन्टेलिजेन्स प्रयोग र जनशक्ति परिचालन सबै गरेका छौं”, उनले हिमाल खबरसँग टेलिफोनमा भने,“जुनसुकै अवस्थामा पनि पक्राउ गरी छाड्छौं ।”

अर्का अभियुक्त रुद्र आचार्य बेलायतमा छन्, उनीविरुद्ध प्रहरीले ‘रेडकर्नर नोटिस’ जारी गरिसकेको छ
।

छोरा कृष्णको हत्यामा संलग्नलाई कारवाहीको माग राख्दै अनसन बसेका नन्दप्रसाद अधिकारीको ६ असोज २०७१ मा निधन भएको थियो ।

अनसनको ३३० औं दिनमा निधन भएका नन्दप्रसादको शव अहिले पनि शिक्षण अस्पताल महाराजगञ्जमा छ ।

कृष्ण अधिकारीको हत्या अभियुक्तलाई थुनामा राख्न सर्वोच्चको आदेश
न्यायालयलाई घेराबन्दी

प्रतिकृया दिनुहोस