आन्दोलनरत मधेशकेन्द्रित दलहरुले पर्सा र बाराका बैंक तथा वित्तिय संस्थाहरुलाई ऋण र ब्याज असुलीमा ताकेता नगर्न उर्दी जारी गरेका छन् ।

संयुक्त लोकतान्त्रिक मधेशी मोर्चा र संघीय मधेशी मोर्चा पर्साले ५ माघमा प्रेस विज्ञप्ति जारी गरी आन्दोलनको समयमा ऋणको साँवा ब्याज नमाग्न भनेका हुन् ।

बैङ्क तथा वित्तिय संस्थाहरुले जनतालाई दुःखदिएको गुनासो आएको दाबी गर्दै त्यसलाई रोक्न वित्तिय संस्थाहरुलाई आग्रह गरिएको संघीय समाजवादी फोरम नेपाल पर्साका अध्यक्ष प्रदीप यादवले बताए ।

‘अधिकारको लागि चलिरहेको आन्दोनलमा सबैले कुनै न कुनै रुपमा सहयोग र समर्थन गरेको’ भन्दै जारी विज्ञप्तीमा लेखिएको छ ‘बारा र पर्साका केही बैकं तथा वित्तिय संस्थाहरुले ऋणको ब्याज र किस्ता बुझाउने वहानामा मधेसी जनता र ऋणीहरुलाई दुःखदिएको गुनासो व्यापक आएको छ । मोर्चा आजैको मितिदेखि त्यस्ता गतिबिधि रोक्न अनुरोध गर्दछ ।’

नेपाल राष्ट्र बैकंले मधेशमा आर्थिक गतिविधि अवरुद्ध रहेको कारण देखाउँदै चैतसम्मको ऋण र व्याज बारे बिभिन्न निर्देशन गरेको भए पनि अटेर गरि जनता र व्यापारीलाई सताउने कार्य भइरहेको भन्दै मोर्चाद्वारा जारी विज्ञप्तीमा राष्ट्र बैकलाई अनुगमन गर्न अनुरोध समेत गरिएको छ ।

आन्दोलनरत दलहरुले ऋणीहरुसँगको व्यवहारमा सुधार नआए सबै बैक तथा वितिय संस्थाहरुमा तालाबन्दी गरिदिने धम्की समेत दिएका छन् ।

विज्ञप्तिमा आन्दोलनको अवधिभरको ऋण तथा व्याज मिनहा गर्न समेत मागं गरिएको छ ।

सुरेश विडारी, वीरगञ्ज

प्रतिकृया दिनुहोस