राजनीतिक नियुक्ति र भागवण्डाले सँधै जसो विवाद भइरहने नेपाल संस्कृत विश्वविद्यालय केन्द्रीय कार्यालय, दाङ मा नौ महिनादेखि लागेको ताला खुलेको छ ।

विभिन्न माग राख्दै कर्मचारी, विद्यार्थी र प्राध्यापक संगठनहरुले केन्द्रीय कार्यालयमा लगाएका ६ वटा ताला ५ माघ रातिबाट खुलेका हुन् ।

विश्वविद्यालयको वार्ता समिति र आन्दोलनरत पक्षबीच पटक–पटक भएका वार्ता र छलफलपछि तालाबन्दी खुलेको विश्वविद्यालयले जनाएको छ ।

गत बैशाखदेखि थालिएको तालाबन्दी सहमतिपछि खुलेको विश्वविद्यालयका शिक्षाध्यक्ष प्राध्यापक रमेशप्रसाद ढकालले जानकारी दिए ।

विश्वविद्यालय वार्ता टोलीका संयोजक एवं विश्वविद्यालयका शिक्षाध्यक्ष प्रा. रमेशप्रसाद ढकाल नेतृत्वको वार्ता टोली, राष्ट्रिय प्राध्यापक संगठनका अध्यक्ष जर्मन चौधरी र राष्ट्रिय कर्मचारी संगठनका अध्यक्ष कमल पोख्रेल नेतृत्वको वार्ता टोलीबीच भएको वार्तामा सहमति र सहकार्य गर्दै अघि बढ्ने सहमति भएपछि ताला खुलेको वार्ता टोलीका संयोजक ढकालले जानकारी दिए ।

यसअघि एमाले, एमाओवादी, नेकपा क्रान्तिकारी माओवादी, नेत्रविक्रम चन्द नेतृत्वको माओवादी निकट प्राध्यापक, कर्मचारी र विद्यार्थीहरुले छुट्टाछुट्टै लगाएका ताला सहमतिपछि खुलेका थिए ।

ताला खुलेपछि विश्वविद्यालय केन्द्रीय कार्यालयको दैनिक प्रशासनिक काम सुचारु भएको छ ।

यद्यपी विश्वविद्यालय प्राध्यापक संघ र कर्मचारी संघले विश्वविद्यालय सेवा आयोगमा लगाएको ताला भने अझै खुल्न सकेको छैन ।

संस्कृत विश्वविद्यालयमा हुने राजनीतिक नियुक्तिमा भागवण्डा नमिल्दा तालावन्दी हुने गरेको छ ।

कुलपतिदेखि प्राध्यापक र अन्य कर्मचारीहरुको नियुक्तिमा हुने यस्तो विवादले विश्विद्यालयको अध्ययन् अनुसन्धान र नियमित काममा समेत प्रभाव हुने गरेको वर्षौ भइसकेको छ ।

एउटा पक्षको उपकुलपति नियुक्त हुने वित्तिकै अर्को पक्षले तालावन्दी गर्ने यहाँको नियमित प्रचलन बनिसकेको छ ।
देविका घर्ती मगर,दाङ

प्रतिकृया दिनुहोस