हिजो रंगेलीमा भएको घटनाको विरोधमा वीरगञ्जमा प्रदर्शन गरिरहेका मधेश केन्द्रित दलका कार्यकर्ताले नेपाल टेलिकमको कार्यालयमा तोडफोडका साथ टेलिफोन क्याविनेटमा आगजनी समेत गरेका छन् ।

टेलिकमको कार्यालयमा ढुंगा प्रहार गर्दै प्रदर्शनकारी । तस्वीर: जियालाल साह

तोडफोड र आगजनीबाट टेलिकम कार्यालयभित्र रहेको ३० र ३६ नम्बरका क्याविनेटमा क्षति पुगी ७ सय लाइन टेलिफोन अवरुद्ध भएको साथै कम्प्युटर लगायतका सामानहरु ध्वस्त भएको निमित्त कार्यालय प्रमुख गिरिराज सुवेदीले बताए ।

उनले भने, “करिब रु ५० लाख बराबरको क्षति पुगेको छ ।”

प्रदर्शनकारीले प्रहार गरेको ढुंगा लागेर बारा, मोतिसरका २० वर्षीय दिनेशप्रसाद यादवको निधारमा गहिरो चोट लागेको छ ।

प्रतिरक्षारत प्रहरी । तस्वीर: जियालाल साह

टेलिकम कार्यालय तोडफोडमा संलग्न वीरगञ्ज–१० गहवाका २८ वर्षीय विजय साह कानु सहित प्रहरीमाथि गुलेलीले आक्रमण गर्ने ६ जनालाई प्रहरीले नियन्त्रणमा लिएको डिएसपी होविन्द्र बोगटीले जानकारी दिए ।

उनीहरुले वीरगञ्जको घण्टाघर चोकमा छपकैयाबाट आईरहेको बा १० प ८३२४ नम्बरको गाडीमा समेत तोडफोड गरेका छन् ।

यसअघि बिहानै प्रदर्शनकारीले सशस्त्र प्रहरीका एसपी भीमबहादुर थापाको गाडी रोकेर पछाडिबाट ढुंगा प्रहार गरेका थिए ।

घण्टाघर चोकमा प्रदर्शनकारी । तस्वीर: जियालाल साह

संघीय समावेशी मधेसी युवा गठबन्धनका नेता कार्यकर्ताहरुले वीरगन्जको घण्टाघर चोकमा ८ माघ बिहान प्रधानमन्त्री केपी ओलीको पुत्ला दहन गरेका छन् ।

प्रदर्शनकारीले गाडीको सिसा पनि फुटाइदिएका छन् । तस्वीर: जियालाल साह

प्रदर्शनका कारण वीरगन्ज बजार बिहानै देखि बन्द भएको छ । उनीहरुले वीरगञ्जमा सार्वजनिक यातायातका सवारी साधनहरु र स्कुल बस समेत चल्न दिएका छैनन् ।
-सुरेश विडारी, वीरगञ्ज

प्रतिकृया दिनुहोस