हिउँदे ठिहीमा तप–तप शीत चुहिने टहरामा बाँचिरहेका भूकम्पपीडितहरूबारे हिमालमा समाचार प्रकाशित भएपछि रसुवाको लहरेपौवामा बसिरहेका हाकू–८ का पीडितलाई न्यानो लुगा वितरण गरिएको छ ।

सबै तस्वीर: बिक्रम राई

१९–२५ पुस २०७२ को हिमाल खबरपत्रिकामा भूकम्पबाट अति प्रभावित पाँच जिल्लाका शिविरहरूमा रहेका पीडितबारे रिपोर्ट प्रकाशित भएको थियो ।

उक्त समाचार पढेर केही मनकारी व्यक्ति र संस्थाहरूले न्यानो कपडा, ब्ल्याङ्केट सहयोग गर्न हिमालको कार्यालयमा सम्पर्क गरेका थिए ।

उनीहरुबाट प्राप्त न्यानो सहयोग १० माघमा लहरेपौवास्थित पीडितहरूसम्म पु¥याउन हिमालकर्मीहरू डम्बरकृष्ण श्रेष्ठ, सन्त गाह मगर र बिक्रम राईले समन्वय गरे ।

वितरण गरिएको राहत मुगा धन कृष्ण कुमारी प्रतिष्ठान, दमक र दमकमै अस्थायी रूपमा बसोबास गर्ने विजया ताम्राकार, उनीसँगै कार्यरत ललितपुर पाटनकी आयुषा श्रेष्ठ र साथीहरूबाट, काठमाडौंका रवि घिसिङ, रिमा श्रेष्ठ र बेलायतबाट आएकी मिरुना मगर, हङकङका सुजित सुब्बा, विष्णु पाख्रिन र साथीहरूबाट प्राप्त भएको हो ।

सबैतिरबाट संकलित राहतमा १२४ वटा ब्ल्याङ्केट र २ देखि १२ वर्षका बालबालिका र वृद्ध–वृद्धाहरू गरी २०० जनालाई पुग्ने जाडोको लुगा थियो ।

यसबाहेक ६० बालबालिकालाई जुत्ता–चप्पल तथा कापी, कलम पनि संकलन भएको थियो ।

संकलित सामग्रीमध्ये लहरेपौवाका ९५ घर पीडितलाई ब्ल्याङ्केट सहित बालबालिका र वृद्ध–वृद्धाहरूलाई न्यानो कपडा र जुत्ता–चप्पल तथा कापी, कलम वितरण गरियोे ।

बाँकी रहेकामध्ये २० ब्ल्याङ्केट र न्यानो लुगाहरू शीतलहरबाट प्रभावित बाराको गढीमाईस्थित नितिनपुर टोलका पासवान बस्तीको लागि स्थानीय समाजसेवी सुगन्धी पासवानलाई हस्तान्तरण गरिएको छ ।

बाराका शीतलहर पीडितलाई बाँडिने राहत बुझ्दै स्थानीय सुगन्धी पासवान ।

संकलन भएर बाँकी रहेका केही न्यानो लुगाहरू अर्को सातासम्ममा सिन्धुपाल्चोकका पीडितहरूसम्म पुर्‍याइने पत्रकार श्रेष्ठले बताएका छन् ।

प्रतिकृया दिनुहोस