मधेशमा आन्दोलन शुरु भएदेखि ठप्प रहेको रौतहटको सार्वजनिक यातायात आज, १३ माघबाट सुचारु भएको छ ।

करिब पाँच महीनाअघि ३० साउनबाट बन्द भएको यातायात कम्तिमा रु ४ करोडको नोक्सानी र अन्य सास्तीपछि आजदेखि सञ्चालनमा आएको हो ।

लामो समयसम्म यातायात ठप्प हुँदा यही व्यवसायमा आश्रित चार सय परिवारको विचल्ली भएको र कम्तीमा रु चार करोड घाटा बेहोर्नु परेको रौतहट बस व्यावसायी संघका अध्यक्ष रामाशंकर गिरीले बताए ।

दुई सय यातायात मजदुर, एक सय कर्मचारी र एक सय जना टिकट बुकरको रोजगारी खोसिएको र चार करोडको क्षति बेहोर्नु परेको गिरीको भनाइ छ ।

यातायात ठप्प रहे पनि रुट परमिट कर, ब्लुबुक नवीकरण, बैंकको व्याज र कर्मचारीको तलब नियमित रुपमा तिर्नुपरेकोले आफूहरु दोहोरो घाटामा परेको गिरीले जानकारी दिए ।

जिल्लाका विभिन्न बजारका साथै लामो दुरीका काठमाडौं, काँकडभिट्टा, जनकपुर, मलंगवा, बरहथवा, वीरगंज, हेटौँडा, नारायणघाट, पोखरालगायतका रुटमा चल्ने ६७ वटा बस आजैबाट सञ्चालनमा आएका छन् ।

सर्वसाधारण, व्यावसायी र अन्य पक्ष सबैको मर्कालाई विचार गरेर दश दिनको लागि यातायात सञ्चालन गर्न स्थानीयस्तरमा सहमति भएको तराई मधेश लोकतान्त्रिक पार्टीका जिला अध्यक्ष बाबुलाल साहले बताए ।
सञ्जयसाह मित्र, रौतहट

प्रतिकृया दिनुहोस