मधेशी जनाधिकार फोरम नेपालका अध्यक्ष एवम् पूर्व उपप्रधानमन्त्री उपेन्द्र यादवसँग हिमालखबरले समसामयिक राजनीतिक विषयमा गरेको संक्षिप्त कुराकानी

राष्ट्रपतिले तोकेको समयसीमा आज सकिंदै छ, दलहरुबीच सहमति भएन नी ?
राष्ट्रपतिको आह्वानमै केही खोट भएपनि सहमतिको सरकार गठन होस्, मुलुकले संकटबाट निकास पाओस्, निर्वाचन होस र मुलुक लोकतान्त्रिक पद्दतिमा अगाडि बढोस भन्ने मनसायले गर्नुभएकोले उहाँको आह्वान सही छ । अब थपिएको समयमा दलहरुले सहमतीय सरकार गठन गर्न सक्नुपर्छ ।

आह्वानमा खोट छ भन्नुभयो, के हो त्यो खोट ?
पहिलो त उहाँले आह्वान गर्नुअघि सबै दलहरुसँग छलफल गर्नुपपर्थ्यो, जुन भएन । दोस्रो, उहाँले संविधानको धारा ३८ (१) उल्लेख नगर्नुपर्थ्यो । धारा ३८ (१) अनुसार सहमति भएन भने ३८ (२) मा जाने ठाउँ छैन । र पनि, उहाँको मनशाय चाहीं गलत छैन ।

मन्त्रिपरिषदले त यसलाई संविधान विपरित भन्यो नि ?
त्यो उद्दण्डता हो । आफैं वैधानिकता र नैतिकता गुमाइसकेको भ्रष्ट सरकारले त्यसो भन्ने ठाउँ नै छैन । बाबुराम भट्टराई मन्त्रिपरिषद्ले अरु केही समय सत्तामा टिक्न निहुँ खोजेको मात्रै हो ।

प्रधानमन्त्री त अंझै पनि सहमति गरौं, मेरै नेतृत्वमा निर्वाचनमा जाउँ भन्दै हुनुहुन्छ नि ?
खै के भन्ने बाबुरामजीलाई ! उहाँ पढेलेखेको मान्छे तर, नैतिकता रहेनछ । संविधान सभा जीवितै छँदा अरु कुनै विकल्प नखोजी, चुनावका लागि आवश्यक व्यवस्था नगरि सत्ता मात्र जोगाउन निर्वाचनको घोषणा गर्ने अनी त्यही निर्वाचन पनि गराउन नसक्ने सरकारको वैधानिकता र नैतिकता अब कहाँ बाँकी रह्यो ? मुलुकमा शान्ति, सुशासन छैन, मन्त्रिहरु नै भ्रष्टाचारले गन्हाउने भइसकेका छन् । अनी यही सरकारलाई अनन्तकालसम्म टिकाइ राख्ने ?

विकल्प के त ?
दलहरुले सहमति गर्नसक्नुपर्छ । कुनै एउटा व्यक्तिमा साझा समर्थन जनाउनुपर्छ । राजनीतिक दलबीचबाट त्यस्तो व्यक्ति आउन सकेन भने तटस्थ व्यक्तिको नेतृत्वमा चुनावी सरकार गठन गर्नुपर्छ । अबको निकास दिने निर्वाचनले नै हो । तर वर्तमान सरकाबाट यो सम्भव छैन ।

नेतृत्वमा तपाईंको दलबाट दाबी हुँदैन ?
अहिले मुलुकलाई निकास चाहिएको हो । निर्वाचन र सुशासन चाहिएको हो । हाम्रो दलबाट प्रधानमन्त्री बन्ने वा मन्त्रिपरिषदमा सहभागी हुने महत्वपूर्ण कुरा होइन ।

प्रतिकृया दिनुहोस