प्रधानमन्त्री केपी शर्मा ओलीले आफूले सरकार छाडेको दिन प्रश्न सोध्ने ठाउँ नहुने गरी काम गरिने दाबी गरेका छन् ।

प्रेस चौतारीले आयोजना गरेको कार्यक्रममा बोल्दै प्रधानमन्त्री ओलीले आफूले सरकार छाडेको दिन के काम गर्नुभयो भनी प्रश्न सोध्ने ठाउँ नहुने भन्दै आफ्नो उद्देश्य काम गर्ने मात्र भएको बताए ।

“अहिले प्राविधरकण बनेर पुनःनिर्माणको महाअभियान सुरु गरिसकेका छौं, फागुन १२ देखि अभियान शुरु गरी चैत १२ मा केही र वैशाख १२ गतेदेखि पाँचवर्षीय पुरातात्विक सम्पदाको निर्माण अघि बढ्छौं”प्रधानमन्त्रीले भने ।

काठमाडौँमा मेट्रो रेल र विद्युतीय बस चलाउने, एक वर्षभित्र विद्युत्भार कटौती अन्त्य गर्ने र दुई वर्षभित्र देशलाई आत्मनिर्भर बनाउने योजना अघि सार्नुलाई उखानटुक्काका रुपमा नलिन उनले आग्रह गरे ।

आफूले बोलेका कुराप्रति आफू जवाफदेही भएको बताउँदै ओलीले थपे,“अहिले मात्र हैन, १०÷२० वर्षअघि भनेको कुराको पनि म जवाफदेहिता र जिम्मेवारी लिन तयार छु ।”

प्रधानमन्त्री ओलीले संविधान बनेर मात्र हैन, विकास निर्माण, राष्ट्रियता, आत्मनिर्भरता, वैदेशिक सम्बन्ध, राष्ट्रिय सार्वभौमसत्ताको जोगाउने सम्बन्धमा देश नयाँ चरणमा प्रवेश गरेको दाबी गरे ।

उनले आन्दोलनरत दलहरु प्रति संकेत गर्दै भने, “संवैधानिक तरिकाले बनाएको संविधानमा दुई÷चार जनाले जिद्दी गर्दैमा सबैले स्वीकार गर्नुपर्ने, ९० प्रतिशतले भनेको नहुने तर दुई÷चार जनाले भनेको मान्नुपर्ने, लोकतन्त्रमा यस्तो कहीँ पनि हुँदैन ।”

उनले आफू छिट्टै भारत र चीन भ्रमणमा जान लागेको र भ्रमणको खास अर्थ हुनेमा ढुक्क हुन आग्रह गरे ।

प्रतिकृया दिनुहोस