१३४ दिनपछि वीरगञ्ज–रक्सौल नाका सुचारु भएसँगै वीरगञ्ज र रक्सौलका समेत स्थानीय र व्यापारीहरु खुशी भएका छन् ।

तस्वीर: जियालाल साह

नाकाबन्दीले गर्दा दैनिक उपभोग्य वस्तुको अभावसँगै दैनिक जीवन नै अस्तव्यस्त भएका स्थानीय र सामान आयात–निर्यात गर्न नपाएपछि टाट पल्टिने अवस्थामा पुगेका व्यापारी नाका खुलेसँगै जनजीवन सहज हुने आशाले खुशी भएका हुन् ।

अपराह्न करिब १ बजेदेखि नाका सुचारु भएपछि वीरगञ्ज भन्सार कार्यालयले १३४ दिनपछि पहिलो पटक आज रु ८८ लाख राजश्व संकलन गरेको वीरगञ्ज भन्सार कार्यालयका प्रवक्ता सुशील शर्माले जानकारी दिए ।

यसअघि पछिल्लो समय दैनिक रु. ३० देखि ३५ लाख राजश्व संकलन हुँदै आएको थियो ।

आज भारतबाट ७० भन्दा बढी गाडीहरु वीरगंज भन्सार यार्डमा भित्रिएको भन्सार प्रमुख मित्रलाल रेग्मीले बताए ।

“माल समान बोकेका ट्रक, कन्टेनरसहित ३५ ह्याभी भेहिकल, ३६ सिमेन्टका कन्टेनर र केही गाडी तथा टयाक्टरहरु भित्रिएका छन्,” रेग्मीले भने ।

संविधानसभाले संविधान जारी गरेपछि असन्तुष्ट रहेको भारतले ५ असोजदेखि भारतबाट नेपालततर्फ सामानको आपूर्ति बन्द गरेको थियो भने त्यसको दुई दिनपछि ७ असोजदेखि मधेशी मोर्चा लगायत मधेशकेन्द्रित दलहरुले सीमा नाकामा धर्ना शुरु गरेका थिए ।

मोर्चाको धर्ना अवधिभर फाटफुट रुपमा दैनिक केही गाडी नेपाल भित्रिए पनि नाकामा अवरोध कायमै थियो ।

नेपालमा रहेका ३० वटा भन्सार कार्यालयमध्ये वीरगन्ज भन्सार कार्यालय एक्लैले यसवर्ष ५१ प्रतिशतभन्दा बढी राजश्व असुलीको लक्ष्य पाएको छ ।

चालु आर्थिक वर्षमा भन्सार विभागको कुल राजश्व असुली लक्ष्य रु २ खर्ब ५ अर्ब रुपैयाँ मध्ये वीरगन्ज भन्सारको भागमा मात्रै रु. १ खर्ब ३ अर्ब छ ।

व्यपार र राजश्व असुली दुबै दृष्टिले महत्पूर्ण नाका वीरगञ्ज–रक्सौल मार्ग थुनिंदा राज्य, व्यापारी साथै सम्पूर्ण मुलुकबासीले ठूलो नोक्सानी व्यहोर्नु परेको छ ।

आज नाका खुलेसंगै अब फेरि अवरोध नहोओस भन्ने यसक्षेत्रका व्यवसायी र सर्वसाधारण सबैको कामना छ ।

नाका खुलेसँगै पुनः बन्द गराउन पुगेको संघीय समाजवादी फोरम र तमलोपाका स्थानीय नेताहरुलाई स्थानीयले नाका खुलै राख्नुपर्ने भन्दै फिर्ता पठाइदिएका थिए । मोर्चाका नेता–कार्यकर्तासँग केही बेर विवाद समेत भएको थियो । तर बेलुका अबेरसम्म नाका सुचारु नै छ ।
जियालाल साह, वीरगञ्ज

प्रतिकृया दिनुहोस