कपिलवस्तुको बाणगंगा–१० मा गोली प्रहारबाट एक होटेल व्यवसायी युवाको हत्या भएको छ ।

बाणगंगा नगरपालिका–१० जितपुर चोकमा साथीहरुसँग रहेका स्थानीय ३६ वर्षीय राजेश सेनमाथि अपरिचित व्यक्तिले गोली प्रहार गरेको प्रहरीले जनाएको छ ।

आज साँझ ७ः३५ बजे नम्बर नखुलेको मोटरसाइकलमा आएका व्यक्तिले गोली प्रहार गरेपछि घाइते भएका सेनको एक घण्टापछि लुम्बिनी अञ्चल अस्पताल बुटवलमा उपचारका क्रममा निधन भएको हो ।

उनको छातीमा दुईवटा गोली प्रहार भएको थियो ।

व्यक्तिगत रिसइवीका कारण गोली प्रहार भएको हुनसक्ने भन्दै प्रहरी नायव उपरीक्षक डिल्लीराज विष्टले अपराधिको खोजी भइरहेको बताए । “सबै नाकामा प्रहरी परिचालन गरेका छौं, खोजी कार्य तिव्ररुपमा भइरहेको छ,” उनले भने ।

सेनमाथि गोली प्रहार भएपछि आक्रोशित स्थानीयले सुरक्षा दिन नसकेको भन्दै प्रहरी–प्रशासन विरुद्ध नारावाजी गरिरहेका छन् ।

घटनास्थल सदरमुकाम तौलहवाबाट २० किमी उत्तर पूर्वपश्चिम राजमार्गमा पर्छ ।
गोपाल भण्डारी, कपिलवस्तु

प्रतिकृया दिनुहोस