संयुक्त लोकतान्त्रिक मधेशी मोर्चाको एक घटक तराई मधेश लोकतान्त्रिक पार्टीले मधेशमा आन्दोलन जारी राख्ने निर्णय गरेको छ ।

बाराको प्रसौनीमामा ३ फागुन साँझ बसेको तमलोपा केन्द्रीय समितिको बैठकले आफ्ना मागहरु सम्बोधन नभएसम्म आन्दोलनलाइ जारी नै राख्ने निर्णय गरेको हो ।

बैठकले मोर्चाले राखेको ११ बुँदे माग सम्बोधन नभएसम्म मधेशमा आन्दोलन जारी नै राख्ने निर्णय गरेको महामन्त्री जितेन्द्र सोनलले जानकारी दिए ।

“अझै सशक्त रुपमा आन्दोलन गर्नुपर्नेमा सबैको एकमत छ, माग पूरा नभएसम्म आन्दोलन जारी राख्छौं,” सोनलले भने ।

बैठकले आमहडतालका बेलाको सरकारी कर, बैंक तथा बित्तिय संस्थाको ब्याज, विद्युत महशुल लगायतमा छुट दिन र हर्जाना नलिनका लागि सरकारसँग माग गर्ने निर्णय समेत गरेको छ ।

अध्यक्ष महन्थ ठाकुरको अध्यक्षतामा बसेको बैठकमा पार्टीका उपाध्यक्ष हृदेश त्रिपाठी, महामन्त्रीद्वय जितेन्द्र सोनल र गोविन्द चौधरी, केन्द्रीय सदस्यहरु तथा बारा, पर्सा, रौतहट र सर्लाहीका तमलोपाका सांसदहरु समेत सहभागी थिए ।

पहिलो पटक बारामा केन्द्रीय बैठक गरेको तमलोपाले अबका हरेक बैठक मधेशमै हुने जनाएको छ ।
सुरेश विडारी, वीरगञ्ज

प्रतिकृया दिनुहोस