प्रधानमन्त्री केपी ओलीले आफू भारत भ्रमणमा जानुअघि नै प्रदेशहरुको सीमाकंन विवाद समाधानका लागि राजनीतिक समिति गठन हुने बताएका छन् ।

७ फागुनबाट हुने आफ्नो भारत भ्रमणबारे व्यवस्थापिका संसदलाई जानकारी गराउँदै प्रधानमन्त्री ओलीले सीमांकन विवाद समाधानका लागि राजनीतिक संयन्त्र गठन गरेर आफू भारत भ्रमणमा जाने बताएका हुन् ।

उनले आफ्नो भ्रमण दुई देशको असमझदारीलाई अन्त्य गर्ने विषयमा केन्द्रित हुने बताएका छन् ।

संविधान निर्माण र जारीको प्रक्रियासँगै दुईदेशबीचमा केही असमझदारी उत्पन्न भएकोे भन्दै प्रधानमन्त्री ओलीले दुई देशबीच असमझदारी हटाई निकटता कायम गर्ने दिशामा आफ्नो भ्रमण केन्द्रित हुने जानकारी गराए ।

“२१ औँ शताब्दीको आवश्यकता अनुसार सम्बन्धलाई पारस्परिक लाभ र सम्मानका हिसाबले अगाडी बढाउने प्रसँगमा भ्रमण गर्ने विचार गरेको छु,” उनले भने ।

भारतभ्रमणका क्रममा विकासको नमूना टेहरी बाँध, भूकम्पपछि पुननिर्माण भएको गुजरातको गुजको समेत अवलोकन गर्ने प्रधानमन्त्रीले जानकारी दिए ।

वैदेशक लगानी आकर्षित गर्ने बिषय पनि आफूले प्राथमिकतामा राखेको प्रधानमन्त्री ओलीको भनाई थियो ।

प्रतिकृया दिनुहोस